বোকাজান/আজাৰাঃ বিজেপিৰ ভাতৃ ছাত্ৰ সংগঠন অখিল ভাৰতীয় বিদ্যাৰ্থী পৰিষদে আজি ৰাজ্যজুৰি ৬৮ সংখ্যক প্ৰতিষ্ঠা দিৱস পালন কৰে৷ ৰাজ্যৰ যিকোনো সমস্যা সন্দৰ্ভত সৰৱ ভূমিকা পালন কৰা সংগঠনটোৱে মহানগৰীৰ লগতে কাৰ্বি আংলং জিলাৰ বোকাজান নগৰৰ ৰাধা-কৃষ্ণ বিবাহ ভৱনতে প্ৰতিষ্ঠা দিৱস পালন কৰে।
বিদ্যাৰ্থী পৰিষদৰ বোকাজান শাখাৰ উদ্যোগত উদযাপন কৰা প্ৰতিষ্ঠা দিৱসত অতিথি হিচাপে উপস্থিত থাকে অখিল ভাৰতীয় বিদ্যাৰ্থী পৰিষদৰ ৰাজ্যিক যুটীয়া সম্পাদক বিপুল ৰাভা, বিদ্যাৰ্থী পৰিষদৰ কাৰ্বি আংলং জিলাৰ প্ৰভাৰী বিনোদ টেৰাঙৰ লগতে স্থানীয় বিধায়ক নোমল ম’মিন। অনুষ্ঠানটোত মুখ্য অতিথি ৰূপে উপস্থিত থাকে বোকাজান পৰিষদীয় সমষ্টিৰ নৱ-নিৰ্বাচিত পৰিষদীয় সদস্য মাধ্যুৰ্য ঢেকিয়াল ফুকন৷
প্ৰতিষ্ঠা দিৱসৰ লগত সংগতি ৰাখি পৰিষদৰ বোকাজান শাখাই আন্তঃবিদ্যালয় কুইজ প্ৰতিযোগিতাও অনুষ্ঠিত কৰে৷ প্ৰতিযোগিতাত বোকাজানৰ বিভিন্ন বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰাৰ লগতে শতাধিক ছাত্ৰ-ছাত্ৰীয়ে প্ৰতিষ্ঠা দিৱসৰ কাৰ্যসূচীত অংশগ্ৰহণ কৰে৷
আনহাতে কামৰূপৰ বালিসত্ৰতো বিস্তৃত কাৰ্যসূচীৰে অখিল ভাৰতীয় বিদ্যাৰ্থী পৰিষদৰ প্ৰতিষ্ঠা দিৱস পালন কৰা হয়। প্ৰতিষ্ঠা দিৱস উপলক্ষে হাজো সমষ্টিৰ অন্তৰ্গত, বিষ্ণুপুৰ বালিসত্ৰ গাঁও পঞ্চায়তৰ প্ৰায় ডেৰ শতাধিক হাইস্কুল শিক্ষান্ত পৰীক্ষা আৰু উচ্চতৰ মাধ্যমিক পৰীক্ষাত উত্তীৰ্ণ কৃতী শিক্ষাৰ্থীসকলক সম্বৰ্ধনা জনাই সংগঠনটোৱে।
বালিসত্ৰ শাখা এবিভিপিৰ সভাপতি জয়ন্ত মাধৱ দাসে আতঁধৰা অনুষ্ঠানটোত আমন্ত্ৰিত অতিথি হিচাপে উপস্থিত থাকে এবিভিপিৰ উত্তৰ প্ৰান্তৰ কাৰ্যালয় প্ৰমূখ নিৰজ চৌধাৰকাৰ, বিজেপিৰ ৰাজ্যিক কাৰ্যনিৰ্বাহক সদস্য জীতু পাটোৱাৰী আৰু সাংবাদিক হৰেন্দ্ৰ অৰ্ণৱ দাস।