গুৱাহাটীঃ পুনৰ লগ লাগিল আঞ্চলিকতাবাদী অসম গণ পৰিষদ আৰু ৰাষ্ট্ৰীয়তাবাদী ভাৰতীয় জনতা পাৰ্টী৷
কেইবাদিনৰ ৰাজনৈতিক উৎকণ্ঠাৰ অন্ত পেলাই মঙলবাৰে নিশা ঘোষণা হ’ল দল দুটাৰ মাজৰ মিত্ৰতাৰ৷ আঞ্চলিকতাবাদ আৰু ৰাষ্ট্ৰীয়তাবাদৰ সনা-পিটিকা অসমীয়া জাতিৰ বাবে কিমান মংগলজনক এই বিতৰ্কৰ মাজতে যোৱা কিছুদিন দুয়ো দলৰ মাজত ‘মিত্ৰতা হ’ব’ নে ‘মিত্ৰতা নহয়’ এই লৈ ওলাইছিল অনেক বাতৰি৷
এই বিতৰ্কৰ মাজতে মঙলবাৰে বিজেপিৰ ৰাষ্ট্ৰীয় সম্পাদক ৰাম মাধৱ আৰু অগপৰ নেতৃত্বৰ মাজত দিনজোৰা আলোচনাৰ অন্তত মাজ নিশালৈ দুয়ো দলে যুটীয়াভাৱে সংবাদ মাধ্যমক তেওঁলোকৰ মিত্ৰতাৰ বিষয়ে অৱগত কৰে৷
জাতিধ্বংসী নাগৰিকত্ব সংশোধনী বিধেয়কক যিকোনো প্ৰকাৰে আইনত পৰিণত কৰিবলৈ বদ্ধপৰিকৰ বিজেপিৰ সৈতে এই আইন সংশোধনীৰ বিৰোধিতা কৰা অগপৰ মিত্ৰতাক লৈ এতিয়া সৃষ্টি হৈছে তীব্ৰ বিতৰ্কৰ৷
অগপই এই মিত্ৰতাৰ জৰিয়তে ইয়াৰ আঞ্চলিকতাবদী আদৰ্শত অন্তিমটো গজাল মাৰিলে বুলি একাংশই দলটোক সমালোচনা কৰাৰ বিপৰীতে আন একাংশই আকৌ অগপৰ এই সিদ্ধান্তক ব্যৱহাৰিক সিদ্ধান্ত বুলি মন্তব্য কৰিছে৷ তেওঁলোকৰ যুক্তি, অগপই এতিয়াও অকলে নিৰ্বাচনত অৱতীৰ্ণ হ’ব পৰা অৱস্থা হোৱাগৈ নাই, সেয়া প্ৰমাণ হৈছে শেহতীয়া পঞ্চায়ত নিৰ্বাচনত৷
তদুপৰি অগপ আৰু বিজেপিৰ মিত্ৰতাই দুয়োটা দলক ৰাজনৈতিকভাৱে লাভান্বিত কৰিব৷ বিজেপিৰ নেতৃত্বয়ো এই কথা অনুধাৱন কৰি অগপৰ সৈতে মিত্ৰতা কৰাটোত পূৰ্বৰেপৰা জোৰ দি আহিছে৷ কাৰণ অগপ-বিজেপিৰ সমন্বিত সমৰ্থনেহে বিজেপিক অসমত স্থিতি মজবুত কৰাত সহায় কৰি আহিছে৷
কালি নিশা দুয়ো দলৰ মাজৰ মিত্ৰতা চূড়ান্ত হোৱাৰ পাছত ৰাম মাধৱে অগপৰ সভাপতি অতুল বৰা আৰু কাৰ্যকৰি সভাপতি কেশৱ মহন্তৰ উপস্থিতিত কয় যে ‘আলোচনাৰ অন্তত বিজেপি আৰু এজিপিয়ে আগন্তুক লোকসভা নিৰ্বাচনত অসমত কংগ্ৰেছক হৰুৱাবলৈ একেলগে কাম কৰাৰ সিদ্ধান্ত গ্ৰহণ কৰিছে৷ বিপিএফ এই মিত্ৰতাৰ তৃতীয় অংশীদাৰ হ’ব৷’
অগপ আৰু বিজেপিৰ এই মিত্ৰতাই আগন্তুক লোকসভা নিৰ্বাচনত বিজেপিক যে সহায় কৰিব সেই ৰাজনৈতিক সমীকৰণ নুই কৰিব নোৱাৰি৷
এই মিত্ৰতাৰ পাছত বিজেপিয়ে অগপক বৰপেটা আৰু কলিয়াবৰ আসন দুখন এৰি দিব৷ আন এখন আসন এৰি দিয়াৰ বাবে আলোচনা চলি আছে যদিও সিদ্ধান্ত চূড়ান্ত হোৱা নাই। সেই অনুসৰি বৰপেটাত কুমাৰ দীপক দাস আৰু কলিয়াবৰত মণি মাধৱ মহন্তই প্ৰাৰ্থিত্ব লাভ কৰাৰ সম্ভাৱনা আছে।