ডিজিটেল ডেস্কঃ ২০১৯ চনৰ লোকসভা নিৰ্বাচনত বিজেপিক প্ৰতিহত কৰাৰ লক্ষ্যৰে অখিলেশ যাদৱে এইবাৰ লালু যাদৱৰ সৈতে মিত্ৰতা গঢ়িব বিচাৰিছে৷ এই বিষয়ত লালু-তেজস্বী যাদৱৰ সৈতে আলোচনা কৰিবলৈ সমাজবাদী পাৰ্টিৰ অধ্যক্ষ অখিলেশ যাদৱে ৰাঁচিলৈ প্ৰতিনিধি হিচাপে প্ৰেৰণ কৰে অতি ঘনিষ্ঠ কিৰণময় নন্দাক৷ 

উল্লেখ্য যে, উত্তৰ প্ৰদেশৰ গোৰখপুৰ আৰু ফুলপুৰৰ উপ-নিৰ্বাচনত সমাজবাদী পাৰ্টিয়ে বিজেপিক ধৰাশায়ী কৰাৰ পাছত ২০১৯ চনৰ লোকসভা নিৰ্বাচনতো বিজেপিক ৰুধিবৰ বাবেই অখিলেশ যাদৱে বিৰোধী দলসমূহৰ সৈতে মিত্ৰতা কৰিছে৷ জানিব পৰা মতে, ২৪ মাৰ্চত সমাজবাদী পাৰ্টিৰ উপাধ্যক্ষ কিৰণময় নন্দাই লালু প্ৰসাদ যাদৱৰ সৈতে বৈঠকত মিলিত হ’ব৷ 

পশু কেলেংকাৰীত অভিযুক্ত হৈ ৰাঁচীৰ বীৰছা মুণ্ডা জেলত বন্দী হৈ থকা লালুপ্ৰসাদ যাদৱৰ সৈতে নন্দাই জেলৰ ভিতৰতে মিলিত হ’ব বুলি জানিব পৰা গৈছে৷ নন্দাই জানিবলৈ দিয়া মতে, লালুৰ সৈতে মিলিত হ’বৰ বাবে জেল কৰ্তৃপক্ষই ইতিমধ্যে অনুমতি প্ৰদান কৰিছে৷ ইয়াৰোপৰি নন্দাই লালুৰ পুত্ৰ তেজস্বী যাদৱৰ সৈতে সাক্ষাৎ কৰিব বুলিও কয়৷ 

উপাধ্যক্ষ গৰাকীয়ে অাৰজেডিৰ সৈতে মিত্ৰতা কৰিব খোজা বিযয়টোৰ সন্দৰ্ভত কয়, আৰজেডিয়ে সমাজবাদী পাৰ্টিৰ সৈতে সহযোগ কৰিব বুলি মোৰ সম্পূৰ্ণ বিশ্বাস আছে৷ কিয়নো লালু প্ৰসাদ যাদৱে নিৰ্বাচনৰ কোনো লাভালাভৰ কথা চিন্তা নকৰি গুৰুত্বপূৰ্ণ সময়ত আমাৰ সৈতে লগলাগিব বিচাৰিছে৷ সেয়ে মিত্ৰতা কৰিব বিচৰাৰ বাৰ্তালৈ লালু-যাদৱৰ সৈতে মিলিত হ’ব বিচৰা বুলি কয় কিৰণময় নন্দাই৷ 

তদুপৰি নন্দাই লগতে কয়, বিজেপি চৰকাৰখনে বৰ্তমান দেশৰ লগতে সাধাৰণ জনতাক বিপথে পৰিচালিত কৰি আহিছে ৷ ২০১৪ চনৰ নিৰ্বাচনৰ পূৰ্বে মোডী নেতৃত্বাধীন কেন্দ্ৰীয় চৰকাৰে কৃষকৰ আয় দুগুণ কৰাৰ লগতে দেশৰ নিৱনুৱা যুৱকক কৰ্ম সংস্থাপনৰ প্ৰতিশ্ৰুতি দিছিল৷ কিন্তু কোনো এটা প্ৰতিশ্ৰুতিয়ে পূৰণ কৰিবলৈ সক্ষম নহ’ল মোডী চৰকাৰ৷ যাৰ বাবে এতিয়া সকলো বিৰোধী দল লগ হৈ বিজেপিৰ জয় যাত্ৰাক পৰাভূত কৰাৰ সময় আহিল বুলি মতপোষণ কৰে কিৰণময় নন্দাই৷