কাৰ ভুলৰ বাবে গুৱাহাটীত আকৌ ১৪ দিনৰ কঠোৰ লকডাউন? কি ক’লে মন্ত্ৰী হিমন্তই?

গুৱাহাটীঃ যমৰ যাতনাতকৈয়ো যেন দুৰ্বিসহ হৈ পৰিছে কৰ’না। প্ৰধানমন্ত্ৰী নৰেন্দ্ৰ মোদীয়ে আনলক-১ ঘোষণা কৰি দেশবাসীক স্বাভাৱিক জীৱনযাত্ৰা আৰম্ভ কৰিবলৈ আহ্বান জনোৱাৰ সময়তে উত্তৰ-পূৱৰ দুৱাৰমুখ স্বৰূপ গুৱাহাটী মহানগৰীত পুনৰ ১৪ দিনৰ বাবে জাৰি কৰা হ’ব লকডাউন। শুকুৰবাৰে দুপৰীয়াৰ ভাগত এখন সংবাদমেল অনুষ্ঠিত কৰি এই কথা সদৰী কৰে ৰাজ্যৰ স্বাস্থ্যমন্ত্ৰী ডঃ হিমন্ত বিশ্ব শৰ্মাই।

আজিৰ সংবাদমেলত মন্ত্ৰীগৰাকীয়ে গুৱাহাটী মহানগৰীত অহা সোমবাৰৰ পৰা ১৪ দিনৰ বাবে লকডাউন বলৱৎ হ’ব বুলি ঘোষণা কৰে। তেওঁ কয় যে দুসপ্তাহৰ এই লকডাউনৰ প্ৰথম ৭ দিন সম্পূৰ্ণৰূপে কঠোৰ কৰা হ’ব।