ঢাকাঃ বাংলাদেশৰ এটি ইস্কন মন্দিৰত ভয়াৱহ ৰূপ ধাৰণ কৰিছে কৰ’নাই। ৰাজধানী ঢাকাস্থিত এই মন্দিৰটোত মূল পুৰোহিতসহ আক্ৰান্ত হৈছে সৰ্বমুঠ ৩৬ জনকৈ লোক। পৰিস্থিতিলৈ চাই চহৰখনৰ স্বামীবাগ অঞ্চলৰ মন্দিৰটো সম্পূৰ্ণৰূপে বন্ধ কৰি দিছে প্ৰশাসনে। বাতৰি অনুযায়ী শুকুৰবাৰে নিশাই মন্দিৰটোত থকা লোককেইজনৰ দেহত কৰ’না পজিটিভ ধৰা পৰা সম্পৰ্কে নিশ্চিত হয় বাংলাদেশৰ স্বাস্থ্য বিভাগ।

ঢাকা মহানগৰ আৰক্ষীৰ সহকাৰী আয়ুক্ত শ্বাহ ইফতেখাৰুলে স্থানীয় সংবাদ মাধ্যমক জনাইছে যে মন্দিৰটোত ৩৬ জন লোক আছিল। লোককেইজনৰ বহুতৰে চৰ্দি-কাহ হোৱাত তেওঁলোক আটাইকেইজনৰে টেষ্ট কৰোৱা হয়। টেষ্টৰ প্ৰথম ৰিপ’ৰ্টতে ধৰা পৰে পজিটিভ।  সোমবাৰে লোককেইজনৰ দ্বিতীয় টেষ্ট কৰা হ’ব।


► ভাইৰাছৰ বিৰুদ্ধে মানুহৰ জয়ৰ কাহিনী... পঢ়িবলৈ ফটোখনত ক্লিক কৰক।


চুবুৰীয়া দেশখনৰ স্বাস্থ্য মন্ত্ৰণালয়ৰ মতে মন্দিৰটোৰ নিৰাপত্তাৰ দায়িত্বত থকা এগৰাকী আৰক্ষী বিষয়াৰ দেহতো ধৰা পৰিছে কৰ’না পজিটিভ। জানিব পৰা মতে মন্দিৰটোত ইস্কন কৰ্তৃপক্ষই বহু দিন আগৰে পৰা সাধাৰণ দৰ্শনাৰ্থী আৰু ভক্তসকলৰ প্ৰৱেশ নিষিদ্ধ কৰিছিল। মন্দিৰ বন্ধ থাকিলেও ৩৬ জন লোক বিগত কিছুদিন ধৰি মন্দিৰ চৌহদত থকা আশ্ৰয় গৃহ এটিত আছিল। তৎসত্বেও লোককেইজন এনেদৰে আক্ৰান্ত হোৱাত উদ্বিগ্ন হৈ পৰিছে চৰকাৰ-প্ৰশাসন তথা মন্দিৰ কৰ্তৃপক্ষ। 

উল্লেখ্য যে, ভাৰতৰ দৰেকৈ বাংলাদেশতো বৰ্তমান অব্যাহত আছে লকডাউন। কিন্তু লকডাউন সত্বেও দেশখনত ক্ৰমাৎ বৃদ্ধি পাবলৈ লৈছে কৰ’নাৰ সংক্ৰমণ। দেওবাৰ পৰ্যন্ত চুবুৰীয়া ৰাষ্ট্ৰখনত কৰ’নাত আক্ৰান্ত হৈছে ৬ সহস্ৰাধিক লোক। আনহাতে মৃত্যুমুখত পৰিছে অতিকমেও ১৪৫ জন।