নতুন দিল্লীঃ ভাৰতীয় সশস্ত্ৰ বাহিনীৰ আধুনিকীকৰণৰ বাবে প্ৰতিৰক্ষা মন্ত্ৰালয়ৰ ডিফেন্স একুইজিচন কাউন্সিলে (ডিএচি) প্ৰায় ১.০৩ লাখ কোটি টকাৰ ১০টা প্ৰধান সামৰিক সৰঞ্জাম ক্ৰয়ৰ প্ৰস্তাৱক মঞ্জুৰী দিছে। প্ৰতিৰক্ষা মন্ত্ৰী ৰাজনাথ সিঙৰ নেতৃত্বত আজি অনুষ্ঠিত এই বৈঠকত সকলো প্ৰস্তাৱ ‘বাই (ইণ্ডিয়ান-আইডিডিএম)’ শ্ৰেণীৰ অধীনত অনুমোদন দিয়া হৈছে, যিয়ে দেশীয় ৰক্ষা উৎপাদনক প্ৰাধান্য দিয়ে।
এই ক্ৰয়ৰ ভিতৰত আছে ভুপৃষ্ঠৰ পৰা আকাশলৈ নিক্ষেপ কৰা ক্ষেপণাস্ত্ৰ, আৰ্মড ৰিকভাৰী ভেহিকল, ইলেকট্ৰনিক ৱাৰফেয়াৰ ছিষ্টেম, আৰু তিনিওটা সেৱাৰ বাবে ইন্টিগ্ৰেটেড কমন ইনভেণ্টৰী মেনেজমেণ্ট ছিষ্টেম।
তদুপৰি, নৌসেনাৰ বাবে মুৰ্ড মাইন, মাইন কাউণ্টাৰ মেজাৰ ভেচেল, ছুপাৰ ৰেপিড গান মাউণ্ট আৰু ছাবমেৰিবল অট’নমাছ ভেচেলৰ প্ৰস্তাৱ অনুমোদিত হৈছে। এই সৰঞ্জামসমূহে বাহিনীৰ গতিশীলতা, বায়ু প্ৰতিৰক্ষা আৰু নৌ নিৰাপত্তা শক্তিশালী কৰিব। প্ৰতিৰক্ষা মন্ত্ৰালয়ৰ মতে, এই ক্ৰয়ে ভাৰতৰ প্ৰতিৰক্ষা ক্ষমতাক উন্নত কৰি আত্মনিৰ্ভৰ ভাৰতৰ লক্ষ্যত অৰিহণা যোগাব।
ইয়াৰ ভিতৰত কুইক ৰিয়েকচন ছাৰফেচ-টু-এয়াৰ মিছাইল (কিউআৰএছএএম) ব্যৱস্থাৰ তিনিটা ৰেজিমেণ্টৰ বাবে ৩০,০০০ কোটি টকাৰ প্ৰস্তাৱো অন্তৰ্ভুক্ত, যি ডিআৰডিঅ’ৰ দ্বাৰা বিকশিত আৰু ৩০ কিলোমিটাৰ পৰিসৰত শত্ৰুৰ বিমান, হেলিকপ্টাৰ আৰু ড্ৰ’ন ধ্বংস কৰিবলৈ সক্ষম।
অপাৰেচন সিন্দুৰৰ সময়ত ভাৰতৰ বায়ু প্ৰতিৰক্ষা ব্যৱস্থাই পাকিস্তানৰ ড্ৰ’ন আৰু মিছাইলৰ আক্ৰমণ প্ৰতিহত কৰাত গুৰুত্বপূৰ্ণ ভূমিকা পালন কৰিছিল। এই নতুন ক্ৰয়ে ভাৰতীয় সেনা, নৌসেনা আৰু বায়ুসেনাৰ কাৰ্যক্ষমতা বৃদ্ধি কৰি শত্ৰুৰ বাবে এক শক্তিশালী বাৰ্তা প্ৰেৰণ কৰিব বুলি আশা কৰা হৈছে।
