সীতাৰামে ক’লে, গোৱা, মণিপুৰ, মেঘালয়ৰ ফৰ্মুলা কৰ্ণাটকতো পালন কৰা প্ৰয়োজন

 | by NNO Digital Desk  |  0
Printer-friendly version

newsnextone.com | ডিজিটেল ডেস্কঃ কৰ্ণাটক বিধানসভা নিৰ্বাচনৰ ফলাফলত কোনো দলেই সংখ্যাগৰিষ্ঠতা লাভ কৰিবলৈ সক্ষম নহ’ল৷ যাৰ ফলত চৰকাৰ গঠনৰ সকলো সিদ্ধান্ত ৰাজ্যখনৰ ৰাজ্যপালৰ ওচৰত ন্যস্ত হৈ পৰিছে৷ ৰাজ্যপালে কোন দলক চৰকাৰ গঠনৰ বাবে আমন্ত্ৰণ কৰিব সেই লৈ জল্পনা কল্পনা চলি থকাৰ সময়তে নিজৰ প্ৰতিক্ৰিয়া ব্যক্ত কৰিছে চিপিএমৰ অধ্যক্ষ সীতাৰাম য়েচুৰীয়ে৷ 

মঙলবাৰে নিৰ্বাচনৰ ফলাফল প্ৰকাশ হোৱাৰ পিছতে সীতাৰাম য়েচুৰীয়ে কয় যে মণিপুৰ, গোৱা আৰু মেঘালয়ত চৰকাৰ গঠনৰ বাবে বৃহৎ দলক আমন্ত্ৰণ কৰা হোৱা নাছিল৷ গতিকে এই নিয়ম কৰ্ণাটকৰ গঠনতো পালন কৰিব লাগে৷

লগতে তেওঁ কংগ্ৰেছৰ প্ৰাক্তন অধ্যক্ষ ছোনীয়া গান্ধী আৰু জেডিএছৰ অধ্যক্ষ এছডি দেৱগৌড়াক বিজেপিক হৰাবৰ বাবে সদায় একজোট হৈ থাকিবলৈ পৰামৰ্শ প্ৰদান কৰে৷ জ্যেষ্ঠ নেতাগৰাকীৰ পৰামৰ্শক সন্মান জনাই প্ৰাক্তন প্ৰধানমন্ত্ৰী দেৱগৌড়াই ধৰ্মনিৰপেক্ষ কংগ্ৰেছ-জেডিএছক মিত্ৰজোঁট কেতিয়াও নাভাঙে বুলি আশ্বাস প্ৰদান কৰে৷

আনহাতে সীতাৰাম য়েচুৰীয়ে টুইট যোগে কয় যে বিজেপিৰ দ্বাৰা নিযুক্ত ৰাজ্যপালে গোৱা, মণিপুৰ অথৱা মেঘালয়ত চৰকাৰ গঠনৰ বাবে বৃহৎ দলক আমন্ত্ৰিত নকৰিলে৷ তেওঁ কয় যে, ২০১৭ চনৰ গোৱা নিৰ্বাচনত ৪০ খন আসনৰ ভিতৰত কংগ্ৰেছে লাভ কৰিছিল ১৭ খন৷ মনিপুৰত ৬০ খনৰ ভিতৰত ২৮ খন আসনেই লাভ কৰিছিল কংগ্ৰেছে৷ 

আনহাতে ২০১৮ চনৰ মেঘালয়ৰ বিধানসভা নিৰ্বাচনত ৬০ খন আসনৰ ভিতৰত কংগ্ৰেছে ২১ খন আসন লাভ কৰি বৃহৎ দল হিচাপে চিহ্নিত হোৱাৰ পিছতো চৰকাৰ গঠন কৰিবলৈ অসফল হৈছিল৷ এই উদাহৰণ কৰ্ণাটকতো পালন কৰাটো প্ৰয়োজনীয় বুলি মন্তব্য কৰে সীতাৰাম য়েচুৰীয়ে৷ 

টুইটত সীতাৰামে বিজেপিৰ জ্যেষ্ঠ নেতা অৰুণ জেটলীৰ এটা টুইটৰ বিষয়েও উল্লেখ কৰে৷ অৰুণ জেটলীৰ টুইটত লিখিছিল যে খণ্ডিত জনাদেশৰ পৰিস্থিতিত সংখ্যাগৰিষ্ঠতা পূৰ্ণ মিত্ৰজোঁটক তেওঁলোকৰ ওচৰত চৰকাৰ গঠনৰ বাবে প্ৰয়োজনীয় সংখ্যা গৰিষ্ঠতা আছে নে নাই সেয়া প্ৰমাণ কৰিবৰ বাবে অনুমতি দিয়া উচিত৷

য়েচুৰীয়ে বিজেপিৰ কটাক্ষ কৰি কয় যে বিজেপি নিৰ্বাচনত পৰাস্ত হোৱা আৰু চৰকাৰ গঠনৰ বাবে সিদ্ধহস্ত৷ এয়া তেওঁলোকৰ পৰিচয় প্ৰমাণ বুলিও কটাক্ষ কৰে চিপিএমৰ নেতাগৰাকীয়ে৷