কলকাতাঃ পূৰ্ব নিৰ্দ্ধাৰিত সময় অনুযায়ী সোমবাৰে পশ্চিম বংগৰ ৰাজধানী কলকাতাত উপস্থিত হয় তেলেংগানাৰ মুখ্যমন্ত্ৰী চিন্তামণি নাগেশা ৰামচন্দ্ৰ ৰাও৷ পশ্চিম বংগৰ মুখ্যমন্ত্ৰী মমতা বেনাৰ্জীয়ে নৱান্নলৈ আদৰণি জনাই ৰাৱক৷ কলকাতাত উপস্থিত হোৱাৰ পিছতেই মমতাই তৃণমূল কংগ্ৰেছৰ আন আন নেতাসকলক চিনাকী কৰি দিয়ে তেলেংগানাৰ মুখ্যমন্ত্ৰী চিন্তামণি নাগেশা ৰামচন্দ্ৰ ৰাৱৰ সৈতে৷ তাৰ পিছত ৰুদ্ধধাৰ বৈঠক অনুষ্ঠিত হয় দুয়োগৰাকী মুখ্যমন্ত্ৰীৰ মাজত৷

২০১৯ চনত অনুষ্ঠিত হ’বলগীয়া সাধৰণ নিৰ্বাচনৰ বাবে ক্ৰমে দেশৰ ৰাজনীতি গৰম হ’ব ধৰিছে৷ কোনে কাৰ সৈতে মিত্ৰজোঁট গঠন কৰি নিৰ্বাচনত অৱতীৰ্ণ হ’ব তাক লৈ দল সমূহৰ মাজত পৰিকল্পনা অব্যাহত থকাৰ সময়তে দুয়োগৰাকী মুখ্যমন্ত্ৰীৰ মাজৰ আলোচনাই বিশেষ তাৎপৰ্যবহণ কৰিছে৷ ২০১৯ চনৰ সাধৰণ নিৰ্বাচনত বিজেপিৰ বিৰুদ্ধে বিৰোধী দলক একত্ৰিত কৰিবলৈ এই বৈঠক অনুষ্ঠিত কৰা বুলি ইতিমধ্যে চৰ্চা আৰম্ভ হৈছে৷

পশ্চিম বংগৰ মুখ্যমন্ত্ৰী মমতা বেনাৰ্জীৰ নাম দেশৰ ৰাজনীতিত চৰ্চা অব্যাহত থকাৰ সময়তে মমতাক সাক্ষাৎ কৰিবলৈ তেলেংগানাৰ মুখ্যমন্ত্ৰী চিন্তামণি নাগেশা ৰামচন্দ্ৰ ৰাও আহে কলকাতালৈ৷ খবৰ মতে, বিজেপি বিৰোধী মিত্ৰ জোঁটৰ পৰিকল্পনা কৰাৰ বাবে এই সাক্ষাৎ অনুষ্ঠিত হ’ব৷