♦ থিতাতে নিহত ১, গুৰুতৰভাৱে আহত ১
ফখৰুল ইছলাম, দৰংঃ দৰঙৰ খাৰুপেটীয়াৰ নিকটৱৰ্তী বুঢ়ীগাঁৱৰ ১৫ নং ৰাষ্ট্ৰীয় ঘাইপথত সংঘটিত হয় ভয়ানক পথ-দুৰ্ঘটনা৷ উল্লেখ্য যে দেওবাৰে সন্ধিয়াৰ তেজপুৰৰপৰা গুৱাহাটীমুখী তীব্ৰবেগী আলট্ৰা বাছ আৰু স্কুটীৰ মুখা-মুখী সংঘৰ্ষ হোৱাত বিজয় সাহা নামৰ এজন স্কুটী আৰোহি থিতাতে নিহত হোৱাৰ লগতে উত্তম সাহা নামৰ আন এজন গুৰুতৰভাৱে আহত হয়|
নিহত বিজয় সাহাৰ ঘৰ খাৰুপেটীয়া টাউনৰ টিলাপট্টীত। আহত উত্তম সাহাৰ ঘৰ খাৰুপেটীয়া টাউনৰ গোপাল নগৰত৷ আহত উত্তম সাহাক সংকটজনক অৱস্থাত মংগলদৈ চিকিৎসালয়লৈ প্ৰেৰণ কৰা হয়৷
গুৱাহটী অভিমুখী এএছ১৩চি৫৭৯৫ নং আলট্ৰা বাছ আৰু এএছ১৩এফ৬২১২ স্কুটীৰ মুখামুখী সংঘৰ্ষত এই পথ দুৰ্ঘটনা সংঘটিত হয়।
উল্লেখ্য যে স্কুটিখনৰ চালক আৰু আৰোহী ৰাষ্ট্ৰীয় ঘাইপথৰ পথৰ সংলগ্ন আৰিহন্ত তেল ডিপোৰপৰা তেল ভৰাই লৈ ৰাষ্ট্ৰীয় ঘাইপথত উঠোতেই গুৱাহাটীমুখী তীব্ৰবেগী আল্ট্ৰা গাড়ীয়ে স্কুটিখনক মহটিয়াই নিয়াত এই মৰ্মান্তিক দুৰ্ঘটনাটো সংঘটিত হ’বলৈ পালে বুলি প্ৰত্যক্ষদৰ্শীয়ে জানিবলৈ দিয়ে| দুৰ্ঘটনাৰ পাছতে খাৰুপেটীয়া অঞ্চলত শোকৰ ছাঁ পৰিছে|