খেৰণিঃ সমাগত লোকসভা নিৰ্বাচন অনুষ্ঠিত কৰাৰ দিন নিৰ্বাচন আয়োগে ঘোষণা কৰাৰ লগে লগেই ব্যাপক তৎপতাৰে পশ্চিম কাৰ্বি আংলঙৰ ডংকামোকামত ৰাজ্যিক মন্ত্ৰী ডঃ হিমন্তবিশ্ব শৰ্মাই বজালে বি জে পিৰ নিৰ্বাচনী ৰণশিঙা।
আগন্তুক লোকসভা নিৰ্বাচনক লক্ষ্য কৰি সোমবাৰে ডংকামোকামত আয়োজন কৰা বি জে পিৰ গণ-সমাৱেশত মন্ত্ৰী হিমন্তবিশ্ব শৰ্মাই দাবী কৰে যে লোকসভা নিৰ্বাচনত সমগ্ৰ অসমৰ লগতে ডিফু লোকসভা সমষ্টিতো বি জে পিৰ জয় নিশ্চিত। কাৰণ অসমৰ বিভিন্ন প্ৰান্তত দ্ৰুত গতিবেগত উন্নয়ন আৰু বিকাশ সাধন কৰি যোৱাৰ সমান্তৰালকৈ পাহাৰীয়া জিলাকেইখনৰ ক্ষেত্ৰতো অধিক গুৰুত্ব আৰু অগ্ৰাধিকাৰ দি উন্নয়ন আৰু বিকাশৰ স্বাৰ্থত বহু অভিলাষী আঁচনি ৰূপায়ন কৰিছে বি জে পি চৰকাৰে।
কাৰ্বি পাহাৰত কোটি কোটি টকীয়া ষ্টুডিয়াম, দুশ বিচনাযুক্ত চিকিৎসালয়, উচ্চ শিক্ষাৰ শিক্ষানুষ্ঠান, পকীপথ নিৰ্মাণ আদিকে কৰি বিভিন্ন প্ৰকাৰৰ আঁচনি ৰূপায়নেৰে বি জে পি চৰকাৰে ৰাইজৰ স্বাৰ্থ পূৰণ কৰিছে বুলিও উল্লেখ কৰে মন্ত্ৰীগৰাকীয়ে।
আনহাতে বিদেশীমুক্ত ৰাজ্য অথবা এজনো বাংলাদেশীক অসমৰ মাটিত অথবা কাৰ্বি পাহাৰত স্থান দিয়া নহ’ব আৰু সেয়াই হৈছে বি জে পিৰ সংকল্প বুলি শৰ্মাই বাংলাদেশীক হুংকাৰ দিয়াৰ বিপৰীতে উপস্থিত ৰাইজক আশ্বাস দিয়ে। মুঠতে কাৰ্বি পাহাৰক বাংলাদেশীমুক্ত জিলা হিচাপে গঢ় দি পাহাৰীয়া জিলাখনত বসবাস কৰা বিভিন্ন জাতি জনগোষ্ঠী, ধৰ্ম, বৰ্ণ, ভিন্ন ভাষা-ভাষীৰ লোকে পাহাৰীয়া ৰাইজৰ স্বাৰ্থ পূৰণ, উন্নয়ন আৰু বিকাশৰ বাবে ঐক্যতাৰে বি জে পি চৰকাৰখনক সহায়-সহযোগ আগবঢ়াই যাবলৈ আৰু আগন্তুক লোকসভা নিৰ্বাচনত বি জে পিৰ প্ৰাৰ্থীক বিপুল ভোটেৰে জয়যুক্ত কৰিবলৈ উপস্থিত ৰাইজক আহ্বান জনায় মন্ত্ৰীগৰাকীয়ে।
আনহাতে ইফালে পাৰ্বত্য জিলাৰ পৰিষদীয় নিৰ্বাচন, চহৰ কমিটী নিৰ্বাচন, সমবায় সমিতিৰ নিৰ্বাচনৰ ইতিহাসেই আগন্তুক লোকসভা নিৰ্বাচনত ডিফু সমষ্টিত বি জে পিৰ জয়ী নিশ্চিত বুলি ইতিমধ্যে সাংবাদিকৰ আগত প্ৰকাশ কৰিছে কাৰ্বি পৰিষদৰ মুখ্য কাৰ্যবাহী সদস্য তুলৰাম ৰংহাঙে।
লগতে বৰ্তমানৰ পৰিৱৰ্তনকামী বি জে পি চৰকাৰখনে পাহাৰীয়া জিলাকেইখনত উন্নয়ন-বিকাশ আদিৰ ক্ষেত্ৰত আমোল পৰিৱৰ্তন আনিছে বুলি দাবী তুলিছে ৰংহাঙে। তদানীন্তন কংগ্ৰেছ চৰকাৰ অথবা এ এছ ডি চি চৰকাৰৰ দিনত পাহাৰীয়া জিলাখনৰ ৰাইজে উন্নয়ন আৰু বিকাশৰ যি ছবি দেখিছিল তাৰ সম্পূৰ্ণ বিপৰীত ছবি দেখিবলৈ পাইছে এতিয়াৰ বি জে পি চৰকাৰৰ দিনত।
আগশাৰীৰ কেইবাখনকৈও উচ্চ শিক্ষানুষ্ঠান, ষ্টুডিয়াম, চিকিৎসা সুবিধা, পাকিপথকে ধৰি দুখীয়া ৰাইজৰ ক্ষুদ্ৰ ক্ষুদ্ৰ সমস্যা সমাধানৰ স্বাৰ্থত বিভিন্ন প্ৰকাৰৰ আঁচনি প্ৰদান কৰিছে বি জে পি চৰকাৰে বুলি প্ৰকাশ কৰে তুলিৰাম ৰংহাঙে।
উল্লেখযোগ্য যে আজিৰ এই গণ-সমাৱেশত মুখ্য অতিথি হিচাপে ৰাজ্যিক মন্ত্ৰী ডঃ হিমন্তবিশ্ব শৰ্মাই অংশ লোৱাৰ বিপৰীতে কাৰ্বি পৰিষদৰ মুখ্য কাৰ্যবাহী সদস্য তুলৰাম ৰংহাং, কাৰ্বি পৰিষদৰ অধ্যক্ষ লংকি তিমুং, কাৰ্যবাহী সদস্যসকলৰ লগতে পৰিষদীয় সদস্য, বিধায়ক ডঃ মানছিং ৰংপি, পশ্চিম কাৰ্বি আংলং জিলা বিজেপিৰ সভাপতি অৰুণ টেৰাং আৰু অন্যান্য নেতাবৰ্গ উপস্থিত থাকে।
মন কৰিবলগীয়া কথা যে এওঁলোকৰ উপস্থিতিত আজি প্ৰায় ডেৰ শতাধিক লোকে কংগ্ৰেছ দল আৰু এ এছ ডি চি আঞ্চলিক দল ত্যাগ কৰি আনুষ্ঠানিকভাৱে বি জে পিত যোগদান কৰে।