গোৰেশ্বৰঃ বাগসা জিলাৰ গোৰেশ্বৰত অপহৰণকাৰীৰ পৰা কৌশলেৰে পলায়ন কৰি প্ৰাণৰক্ষা পৰে এজন লোক। আৰক্ষীয়ে অপহৰণকাৰীসহ উদ্ধাৰ কৰে অপহৰণকাৰীৰ গাড়ী। কামৰূপ জিলাৰ কমলপুৰ থানাৰ অন্তৰ্গত ক'লাজলৰ পৰা তিনিজন চিনাকি লোকে কৌশলেৰে গাড়ীত ভৰাই সংঘটিত কৰিছিল এই অপহৰণ কাণ্ড।
কমলপুৰ থানাৰ অন্তৰ্গত বাইহাটা চাৰিআলি গোৰেশ্বৰ সংযোগী পথৰ ক'লাজলৰ পৰা কমলপুৰৰ খৰিকট গাওঁৰ এজন লোকক কৌশলেৰে অপহৰণ কৰে তিনিজন লোকে। মাটি কিনা বেচাৰ এক লেন-দেনৰ সূত্ৰে খৰিকট গাওঁৰ মঞ্জুল দেৱান নামৰ লোকজনে গোৰেশ্বৰ থানাৰ অন্তৰ্গত বাঙালীপাৰাৰ তাইজুদ্দিন আলীক দিবলগা ৫০ হাজাৰ টকা লৈ ক'লাজলত লগ কৰোতে কৌশলেৰে মঞ্জুল দেৱানৰ গাড়ীত ভৰাই লৈ গোৰেশ্বৰ অভিমুখে লৈ আহে।
পৰিয়ালে বিষয়টো অৱগত হৈ থানাত খবৰ দিয়াত বাঙালীপাৰা আৰক্ষী চকীৰ আৰক্ষীয়ে শুৱাগপুৰত গাড়ীসহ তিনিজন অপহৰণকাৰীক আটক কৰে। এ এছ ০১ বি কে ০৪৩৪ নম্বৰৰ এল্ট'সহ শুৱাগপুৰৰ তাইজুদ্দিন আলী (৫০), পত্নী পৰিনাচা বিবি আৰু গাডীচালক বিপুল আলীক (৩৭)ক শুৱাগপুৰত আবেলি প্ৰায় ৪-৩০ বজাত আটক কৰে।
ইফালে গোৰেশ্বৰৰ ভোগপুৰ পোৱাৰ লগে লগে প্ৰস্ৰাব লগা বুলি কৌশলেৰে মঞ্জুল দেৱানে পলাই আৰক্ষীৰ সৈতে যোগাযোগ কৰে। গোৰেশ্বৰ থানাৰ ভাৰপ্ৰাপ্ত আৰক্ষী বিষয়া হেৰম্ব গোস্বামী, ডিএছপি কংকনজ্যোতি নাথ, শুৱাগপুৰ আৰক্ষী চকীৰ বিষয়া দীপক শৰ্মাই চলোৱা অভিযানত এই আটাইকেইজনক আটক কৰি সোধ পোছ অব্যাহত ৰাখিছে। মঞ্জুল দেৱানে জনোৱা মতে মঞ্জুলৰ এ এছ ০১ এ ৱাই ৫৯২৮ নম্বৰৰ বাইকখনো অপহৰণকাৰী চতুৰ্থ লোক এজনে লৈ যায়। এই ঘটনাই অঞ্চলটোত চাঞ্চল্যৰ সৃষ্টি কৰিছে।