ডিজিটেল ডেস্কঃ কৃষকৰ উৎপাদিত শস্যৰ দুগুণ দাম দিয়াৰ পৰা আৰম্ভ কৰি বছৰটোৰ বাৰমাহে জলসিঞ্চনৰ ব্যৱস্থা কৰি দিম বুলি নাগৰিকক প্ৰতিশ্ৰুতি দি শাসনলৈ অহা মধ্যপ্ৰদেশৰ চৰকাৰখনৰ শাসনকালতে কৃষকৰ আত্মহত্যাৰ ঘটনা ২১ শতাংশ বৃদ্ধি পোৱাৰ চাঞ্চল্যকৰ তথ্য লোকসভাৰ মজিয়াত প্ৰকাশ পোৱাৰ সময়তে এক টুলুঙা মন্তব্যই সৃষ্টি কৰিছে অইন এক চাঞ্চল্য।
কৃষকক আত্মহত্যাৰ দৰে স্পৰ্শকাতৰ বিষয় এটাক লৈ টুলুঙা মন্তব্য দি চৰ্চালৈ আহিছে ৰাজ্যখনৰ কৃষিমন্ত্ৰী বালকৃষ্ণ পাতিদাৰ। 'আত্মহত্যা কোনেনো নকৰে? ব্যৱসায়ীৰ পৰা আৰম্ভ কৰি আৰক্ষী পৰ্যন্ত আত্মহত্যাৰ দৰে চৰম সিদ্ধান্তত উপনীত হয়। সমগ্ৰ বিশ্বই এই সমস্যাৰ সৈতে যুঁজি আছে। কৃষকৰ মাজতে এয়া সীমাবদ্ধ নহয়।’ এই মন্তব্য কৃষিমন্ত্ৰী বালকৃষ্ণৰ।
কৃষি প্ৰধান দেশ ভাৰতৰ প্ৰায় সকলো ৰাজ্যতে কৃষকে উৎপাদিত শস্যৰ উচিত মূল্য নাপাই আত্মহত্যা কৰাৰ ঘটনা ক্ৰমাতঃ বাঢ়ি অহাৰ সময়তে দেওঁবাৰে এই মন্তব্য কৰে কৃষি মন্ত্ৰী গৰাকীয়ে। বিজেপি শাসনাধীন ৰাজ্যখনত ২০১৩ চনৰ পৰা খেতিয়েকৰ আত্মহত্যাৰ সংখ্যা লক্ষণীয়ভাৱে ২১% বৃদ্ধি পোৱাৰ লগে লগে ৰাজ্যখনে কৃষকৰ আত্মহত্যাৰ ক্ষেত্ৰত দেশৰ ভিতৰতে তৃতীয় স্থান দখল কৰিছে।
লোকসভাত কেন্দ্ৰীয় কৃষি মন্ত্ৰী পুৰুষত্তম ৰোপলাই শেহতীয়া বাজেত অধিবেশনত দাখিল কৰা প্ৰতিবেদনত এই তথ্য প্ৰকাশ পাইছে। বিষয়টোৰ গুৰুত্ব অনুধাৱন নকৰাকৈ কৃষিমন্ত্ৰী পাতিদৰে এনেদৰে টুলুঙা মন্তব্য কৰা বুলি সংবাদ মাধ্যমৰ লগতে ছ'চিয়েল মিডিয়াটো ক্ষুৰধাৰ সমালোচনাৰ সন্মুখীন হ'বলগীয়া হৈছে৷