নগাঁওঃ “বিগত সময়ছোৱাত পঞ্চায়ত দুৰ্নীতিৰ বেহা চলিছিল ৷ পঞ্চায়তলৈ যি ধন আহিছিল কংগ্ৰেছৰ নেতা-পালিনেতাসকলে সেয়া উদৰস্থ কৰিছিল ৷ সাধাৰণ লোকৰ কথা পাহৰি ক্ষমতাৰ অপপ্ৰয়োগৰে স্বজন-তোষণত মত্ত হৈ নিজৰ পকেট গৰম কৰি লাহ-বিলাহত উপঙি ফুৰা কংগ্ৰেছে আনকি এ পি এছ ছিৰ দৰে পৰীক্ষাতো দুৰ্নীতিৰ ৰাজত্ব চলাই প্ৰভুত্ব বিস্তাৰ কৰিছিল ৷ কিন্তু তেনে অনাহুত পৰিৱেশৰ অৱসান ঘটাই তেনে সময়তে আমাৰ ৰাজ্যৰ লগতে দেশ খনত খাটি খোৱা জনতাই ভাৰতীয় জনতা পাৰ্টীক শাসনত অধিষ্ঠিত কৰিছিল৷ আজি ৰাইজে দেখি আনন্দিত হৈছে ইতিমধ্যে ঘোষিত হোৱা এ পি এছ ছি পৰীক্ষাত কোনো ধৰণৰ কেলেংকাৰী নোহোৱাকৈ দুখীয়া ঘৰৰ মেধাৱী ল’ৰা-ছোৱালীও উত্তীৰ্ণ হৈ আনন্দৰ নিজৰা কঢ়িয়াই আনিছে৷ এয়া নিশ্চয় পৰিৱৰ্তনৰেই ফল৷ গতিকে পৰিৱৰ্তন এতিয়া পঞ্চায়তীৰাজ ব্যৱস্থাতো দাঙি ধৰিবলৈ আমি আগবাঢ়ি আহিব লাগিব৷”
শুকুৰবাৰে নগাঁও জিলাৰ সদৰ সমষ্টিৰ অন্তৰ্গত বেবেজীয়া-ডিমৌ-বাংঠাই গাঁও পঞ্চায়তৰ আগন্তুক পঞ্চায়ত নিৰ্বাচনৰ বেবেজীয়াস্থিত মুখ্য কাৰ্যালয়ৰ শুভাৰম্ভ কৰি এই গুৰুত্বপূৰ্ণ মন্তব্য দাঙি ধৰে ভাৰতীয় জনতা পাৰ্টীৰ অসম ৰাজ্যিক মুখপাত্ৰ কুইন ওজাই৷
