জয়ন্ত মুদৈ, নগাঁওঃ নগাঁও জিলাৰ জাজৰি থানাৰ অন্তৰ্গত ৰাইদঙীয়াৰ গৰৈমাৰীত সংঘটিত হোৱা এক পথ দুৰ্ঘটনাত এজন লোকৰ কথমপি প্ৰাণৰক্ষা পৰে৷

প্ৰাপ্ত তথ্য মতে, কামৰূপ জিলাৰ মিৰ্জাৰপৰা বৰদোৱা অভিমুখে আহি থকা এএছ০১ডিচি৪৩৩৭ নম্বৰৰ এলপিজি চিলিণ্ডাৰভৰ্তি ট্ৰাকখন শুকুৰবাৰে পুৱা প্ৰায় চাৰে আঠ বজাত নিয়ন্ত্ৰণ হেৰুৱাই নগাঁও-ধিং সংযোগী গড়কাপ্তানী পথৰ গৰৈমাৰীৰ দলঙৰ সমীপত দ খাৱৈত সোমাই যোৱাত দুৰ্ঘটনাটো সংঘটিত হয়৷

ফলত ট্ৰাকখনৰ টিআলি নামৰ চালকজন গুৰুত্বৰভাৱে আহত হয়৷ পানীৰ তলত ট্ৰাকখনৰ সৈতে সোমাই যোৱা চালকজনৰ কথমপিহে প্ৰাণৰক্ষা পৰে৷ পাছত স্থানীয় ৰাইজৰ সহযোগত জাজৰি আৰক্ষীয়ে আহত চালকজনক উদ্ধাৰ কৰি চিকিৎসাৰ ব্যৱস্থা কৰে৷

জানিব পৰা মতে, বৰদোৱাৰ ইন্ধন গেছ এজেন্সিলৈ এলপিজি চিলিণ্ডাৰ কঢ়িয়াই অনা দুৰ্ঘটনাগ্ৰস্ত ট্ৰাকখনত মুঠ ৩০৬ টা চিলিণ্ডাৰ আছিল৷