♦ বড়ো ভোট বিভাজনৰ আশংকা
♦ বিজেপি-বিপিএফৰ বুজাবুজিত আউল লগাব পাৰে ইউপিপিএলৰ প্ৰাৰ্থীয়ে
ওদালগুৰিঃ শনিবাৰে ঘোষণা হোৱাৰ সম্ভাৱণা আছে বিজেপিৰ লোকসভা নিৰ্বাচনৰ প্ৰাৰ্থী-তালিকা। ইয়াৰ মাজতে মংগলদৈ লোকসভা সমষ্টিৰ প্ৰাৰ্থীক লৈ ওদালগুৰিকে ধৰি লোকসভা সমষ্টিটোৰ ভিন্ন প্ৰান্তত চলিছে ব্যাপক চৰ্চা।
উল্লেখ্য যে বিগত দুটাকৈ লোকসভা নিৰ্বাচনত ৮ নম্বৰ মংগলদৈ লোকসভা সমষ্টিত বিজেপিৰ প্ৰাৰ্থী হিচাপে ৰমেন ডেকাই জয়লাভ কৰি দহ বছৰ প্ৰতিনিধিত্ব কৰিলে সমষ্টিটোক। কিন্তু এইবাৰ সমষ্টিটোত ৰমেন ডেকাৰ প্ৰাৰ্থিত্বক লৈ বিভিন্ন মহলত চলিছে ভিন্ন চৰ্চা।
ইফালে ৰাষ্ট্ৰীয় দলটোৰ মংগলদৈ সমষ্টিৰ প্ৰাৰ্থী তালিকাত আছে ৰমেন ডেকাৰ লগতে জয়ন্ত মল্ল বৰুৱা আৰু দিলীপ শইকীয়াৰ নাম। বিজেপিৰ সৈতে বুজাবুজি মৰ্মে মংগলদৈ সমষ্টিত বিজেপিৰ প্ৰাৰ্থীক সমৰ্থন জনাব বিপিএফ দলে।
বিপিএফে সমষ্টিটোৰ বাবে বিচাৰে সাংসদ ৰমেন ডেকাক। এই কথা বিপিএফৰ ৰাজ্যসভাৰ সাংসদ বিশ্বজিত দৈমাৰীয়ে ইতিমধ্যে ইংগিত প্ৰদান কৰি প্ৰকাশ কৰিছে।
উল্লেখযোগ্য যে মংগলদৈ সমষ্টিৰ অন্তৰ্গত ওদালগুৰি জিলাখনত বিপিএফৰ ব্যাপক প্ৰভাৱ আছে। জিলাখনৰ তিনিটাকৈ বিধানসভা সমষ্টিত আছে বিপিএফ বিধায়ক। তেনে ক্ষেত্ৰত বিজেপিয়ে উক্ত সমষ্টিটোত কাক প্ৰাৰ্থিত্ব প্ৰদান কৰে সেয়া লক্ষনীয় হৈ পৰিছে।
আনহাতে বিপিএফ-বিজেপিৰ বুজাবুজিত আউল লগাবলৈ সাজু হৈছে বিটিচিৰ বিৰোধী ৰাজনৈতিক দল ইউজি ব্ৰহ্মৰ নেতৃত্বাধীন ইউপিপিএল। মংগলদৈ লোকসভা সমষ্টিৰ বাবে দলটোৱে প্ৰাৰ্থিত্ব ঘোষণা কৰিছে এবছুৰ প্ৰাক্তন উপ-সভাপতি, বিএচিৰ প্ৰাক্তন উপাধ্যক্ষ তথা ইউপিপিএলৰ সাধাৰণ সম্পাদক প্ৰদীপ কুমাৰ দৈমাৰীক।
য'ত আছে বড়ো জাতীয় সংগঠন এবছু আৰু এন ডি এফ বিৰ প্ৰত্যক্ষ সহযোগ। ফলত বড়ো ভোট বিভাজন হোৱাৰ পূৰ্ণ সম্ভাৱনা দেখা গৈছে। এনে প্ৰেক্ষাপটত যি বিপিএফৰ সমৰ্থনৰ বাবেই সাংসদ ডেকাই তৃতীয়বাৰৰ বাবে মংগলদৈতে বিজেপিৰ দলীয় প্ৰাৰ্থিত্বৰ দাবীদাৰ হৈ পৰিছে তেনে ক্ষেত্ৰত ইউপিপিএলৰ প্ৰাৰ্থিত্বই বিপিএফ আৰু বিজেপিৰ নিৰ্বাচনী সমীকৰণত আউল লগোৱাটো একপ্ৰকাৰ নিশ্চিত হৈ পৰিছে।
অৱশ্যে নিৰ্বাচনৰ বাবে দলসমূহে কি ৰণকৌশল তৈয়াৰ কৰে সেয়া হ’ব লক্ষণীয়।