নাগপুৰঃ যি মানুহে সৰ্বাধিক প্ৰতাৰণা কৰিব পাৰে, তেৱেঁই শ্ৰেষ্ঠ নেতা হ’ব পাৰে। – মঙলবাৰে নাগপুৰৰ অখিল ভাৰতীয় মহানুভৱা পৰিষদত এই মন্তব্য কৰে কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে।
ৰাষ্ট্ৰীয় স্বয়ংসেৱক সংঘৰ সৈতে দীৰ্ঘদিন ধৰি জড়িত হৈ থকা ৬৮ বছৰীয়া বিজেপি নেতাগৰাকীয়ে কয়, “মই য’ত কাম কৰো, তাত সম্পূৰ্ণ হৃদয়েৰে সঁচা কথা কোৱাৰ কোনো সুযোগ নাই। কিন্তু এটা কথা সঁচা- ভাগৱতত কোৱাৰ দৰে সত্যই চূড়ান্ত বিজয়ী। শ্বৰ্টকাট নাই।”
ভাষণত গাডকাৰীয়ে মানুহৰ প্ৰতি সততা আৰু ভক্তিৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয়, “মহানুভৱ সম্প্ৰদায়ৰ প্ৰতিষ্ঠাপক চক্ৰধৰ স্বামীয়ে আমাক আমাৰ জীৱনটো জীয়াই থাকিবলৈ সত্য, অহিংসা, শান্তি, মানৱতা আৰু সমতা শিকাইছিল। নিজকে জোৰ কৰি কোনেও মহান নহয়। ইতিহাসলৈ চাওক- যিসকল নেতাক ৰাইজে স্বীকাৰ কৰি লৈছে, তেওঁলোকে কেতিয়াও জোৰ-জবৰদস্তি কৰিব লগা হোৱা নাছিল।”
গাডকাৰীয়ে আৰু কয়, “প্ৰতিজন ব্যক্তিৰ নিজস্ব স্বভাৱ আৰু উদ্দেশ্য থাকে (‘হাওচে, নৱছে, গাভছে’)। গতিকে, বহু সময়ত মানুহক বুজি পায় আৰু প্ৰভাৱিত কৰি সফল হোৱা নেতাই সেই ঠাই পায়।”
ইফালে গাডকাৰীৰ মন্তব্যৰ পিছতে তীব্ৰ প্ৰতিক্ৰিয়াৰ সৃষ্টি হৈছে ৰাজনৈতিক মহলত। বিশেষকৈ কংগ্ৰেছে কেন্দ্ৰীয় মন্ত্ৰীগৰাকীৰ এই মন্তব্যৰ প্ৰতি সমৰ্থন আগবঢ়াই বিজেপি চৰকাৰৰ কঠোৰ সমালোচনা আৰম্ভ কৰিছে। প্ৰণিধানযোগ্য যে পূৰ্বেও নীতিগত মন্তব্য আৰু মানৱহৈতষী চিন্তাধাৰাৰে একাধিকবাৰ বাতৰিৰ শিৰোনাম দখল কৰি আহিছে নীতিন গাডকাৰীয়ে।
