newsnextone.com | ডিজিটেল ডেস্কঃ থাইলেণ্ডত প্ৰায় ২ সপ্তাহ ধৰি গুহাৰ ভিতৰত আবদ্ধ হৈ থকা ফুটবল দলটোৰ ৪ গৰাকী কিশোৰক উদ্ধাৰ কৰিবলৈ সক্ষম হয় উদ্ধাৰকাৰী দলে৷ দ্ৰুত চেষ্টা অব্যাহত ৰখাৰ ফলতেই ৪গৰাকী কিশোৰক উদ্ধাৰ কৰিবলৈ সক্ষম হয়৷ থাই প্ৰশাসনিক বিষয়াই ৰবিবাৰে সংবাদ মাধ্যমক গুহাৰ সমীপত স্থাপিত শিৱিৰৰ ঠাই খালী কৰি দিয়াৰ বাবে আহ্বান জনাইছিল৷
প্ৰশাসনিক বিষয়াই সংবাদকৰ্মীসকলক ভুক্তভোগীসকলৰ সুবিধাৰ্থে ঠাইটুকুৰা খালী কৰিবলৈ কয়৷ আনহাতে থাই প্ৰশাসনৰ এই সিদ্ধান্তৰ পিছতে আবদ্ধ ফুটবল দলটোক উদ্ধাৰৰ বাবে প্ৰশাসনৰ সেয়া অন্তিম প্ৰয়াস বুলি অনুমান কৰা হৈছে৷
উল্লেখ্য যে, ‘ৱাইল্ড বোৰ্স’ নামৰ ফেুটবল টীমৰ প্ৰশিক্ষক সহ ১৩ গৰাকী সদস্যই ২৩ জুনত গুহাৰ ভিতৰলৈ যোৱাৰ পৰা ধাৰাসাৰ বৰষুণ আৰু বতৰ পৰিবৰ্তনৰ বাবে আবদ্ধ হৈ পৰে৷
এই দুৰ্ভাগ্যজনক ঘটনাৰ পিছত থাইলেণ্ডৰ লগতে সমগ্ৰ বিশ্বৰ ধ্যান লুৱাং নামৰ গুহাটোত আবদ্ধ হৈ পৰা ফুটবল দলটোৰ ওপৰত নিৱিষ্ট হয়৷ গুহাৰ বাহিৰৰ এখন পৰ্বতৰ সমতল ভূমিত বিশ্বৰ হাজাৰোধিক সংবাদকৰ্মীয়ে ঘটনাৰ বাতৰি পৰিৱেশন কৰিবলৈ উপস্থিত হয়৷