গুৱাহাটীঃ আগন্তুক লোকসভা নিৰ্বাচনক কেন্দ্ৰ কৰি ভাৰতীয় জনতা পাৰ্টীয়ে আৰম্ভ কৰিলে 'ভাৰত কী মন কী বাত, নৰেন্দ্ৰ মোদী কে চাথ’। ইয়াৰ বাবে সোমাবাৰে অসম লোকসভা আয়োগৰ কাৰ্যলয়ৰ সন্মুখত দলীয় প্ৰচাৰৰ বাবে পাঁচখন বাহন মুকলি কৰে মুখ্যমন্ত্ৰী সৰ্বানন্দ সোণোৱালে।
যোৱা ৩ ফেব্ৰুৱাৰীত দলটোৱে আনুষ্ঠানিকভাৱে এই প্ৰচাৰ অভিযান আৰম্ভ কৰিছিল। আজি মুকলি কৰা এই বাহনৰ সহায়ত দলটোৱে গাৱেঁ গাৱেঁ নিৰ্বাচনী প্ৰচাৰ কৰিব।
অসমৰ উজনি, নামনি আৰু বৰাক উপত্যকাৰ ৩৩ খন জিলাৰ প্ৰতিটো সমষ্টিলৈ বাহনকেইখন প্ৰচাৰৰ বাবে নিয়া হ’ব।
ইফালে, দলীয় সূত্ৰই প্ৰকাশ কৰা মতে, ৰাইজৰ মনৰ কথা সন্নিবিষ্ট কৰি লোকসভা নিৰ্বাচনৰ বাবে দলে ইস্তিহাৰ প্ৰকাশ কৰিবলৈ থিৰাং কৰিছে।
আজিৰ অনুষ্ঠানত উপস্থিত আছিল অসমৰ দায়িত্বত থকা বি জে পি নেতা মহেন্দ্ৰ সিং, ৰাজ্যিক সভাপতি ৰঞ্জিত দাস, বিধায়ক ডঃ নোমল মমিন, ফণীন্দ্ৰ নাথ শৰ্মা আদি।