ৰঙিয়াঃ নামনি অসমত অব্যহত আছে গাড়ী চোৰৰ দৌৰাত্ম। গাড়ী চোৰৰ বিৰুদ্ধে আৰক্ষীয়ে অভিযান চলাই থকতাৰ মাজতে ৰঙিয়া আৰক্ষীয়ে নলবাৰী বেলশৰৰ পৰা চুৰি হোৱা এখন টাটা মেজিক ৰঙিয়াত উদ্ধাৰ কৰে।

আৰক্ষী অভিযানত ধৰা পৰাৰ ভয়ত ৰঙিয়াৰ মৰাণজানাৰ ৩১ নং ৰাষ্ট্ৰীয় ঘাইপথৰ দাঁতিত চোৰৰ দলে এৰি থৈ যায় AS-01-CC-2229 নামৰ মেজিকখন৷ ৰঙিয়া আৰক্ষীয়ে উদ্ধাৰ কৰে বাহনখন।

নলবাৰী বেলশৰৰ ৰমণি বৰ্মন নামৰ এই লোকজনৰ ঘৰৰ পৰা সোমবাৰে পুৱতি নিশা চুৰি হৈছিল এই বাহনখন। চোৰৰ দলে গাড়ীৰ লক ভাঙি হিন্দী চিনেমাৰ কায়দাৰে বাহনখন লৈ উধাও হৈছিল।

আৰক্ষীৰ অভিযানত বাহনখন উদ্ধাৰ হয় যদিও পলাই যাবলৈ সক্ষম হয় চোৰৰ দল। চোৰৰ দলটোৱে গাড়ীখন থৈ যায় যদিও বেটাৰী সহ আন বহু সামগ্ৰী লৈ যায়৷