নতুন দিল্লী: ক্ষমতাচ্যুত হৈও বিপদমুক্তি হোৱা নাই দুই আপ নেতা মনীষ ছিছ’দিয়া আৰু সত্যেন্দ্ৰ জৈনৰ। পূৰ্বৰ দিল্লীৰ অৰবিন্দ কেজৰিৱাল চৰকাৰৰ এই দুই মন্ত্ৰীৰ বিৰুদ্ধে পূৰ্বে উত্থাপিত হৈছিল সুৰা কেলেংকাৰীৰ অভিযোগ। এই অভিযোগত দীৰ্ঘসময় কাৰাবাসো খাটিবলগীয়া হৈছিল দুয়োজনে। কিন্তু এইবাৰ চৰকাৰী বিদ্যালয়ৰ শ্ৰেণীকোঠা নিৰ্মাণৰ নামত ২০০০ কোটি টকাৰ কেলেংকাৰী সংঘটিত কৰাৰ অভিযোগত নাম সাঙোৰ খাই পৰিছে মনীষ ছিছ’দিয়া আৰু সত্যেন্দ্ৰ জৈনৰ।
দিল্লী আৰক্ষীৰ দুৰ্নীতি নিবাৰক শাখাই এই দুগৰাকী নেতাৰ বিৰুদ্ধে এফআইআৰ দাখিল কৰাৰ লগতে সক্ৰিয় তদন্ত আৰম্ভ কৰিছে। এই গোচৰত এজন অচিনাক্ত চৰকাৰী বিষয়া আৰু এজন ঠিকাদাৰো জড়িত বুলি দিল্লী আৰক্ষীয়ে জানিবলৈ দিছে। উল্লেখ্য যে, কেজৰিৱাল চৰকাৰৰ শিক্ষামন্ত্ৰী আছিল প্ৰাক্তন উপ-মুখ্যমন্ত্ৰী মনীষ ছিছ’দিয়া। আনহাতে সত্যেন্দ্ৰ জৈন আছিল ৰাজহুৱা কাম-কাজ বিভাগৰ দায়িত্বত। এই বিভাগৰ অধীনত চৰকাৰী বিদ্যালয় আৰু অট্টালিকা নিৰ্মাণৰ কাম কৰা হৈছিল।
তদন্তত ১২ হাজাৰৰো অধিক শ্ৰেণীকোঠা নিৰ্মাণৰ ক্ষেত্ৰত প্ৰায় ২ হাজাৰ কোটি টকাৰ ব্যাপক অনিয়ম আৰু আৰ্থিক দুৰ্নীতিৰ আশ্ৰয় লোৱাৰ অভিযোগ উত্থাপন হৈছে। দিল্লী আৰক্ষীৰ সূত্ৰই জনোৱা মতে, এই নিৰ্মাণৰ ঠিকা লাভ কৰা ৩৪জন ঠিকাদাৰ আটাইকেইজনেই আপৰ ঘনিষ্ঠ বুলি প্ৰমাণ পোৱা গৈছে। সময়মতে নিৰ্মাণ সম্পূৰ্ণ নোহোৱাৰ বাবে খৰচ আকাশলংঘী হয়। বিজেপিৰ অভিযোগ অনুসৰি প্ৰতিটো শ্ৰেণীকোঠা নিৰ্মাণৰ খৰচ প্ৰায় পাঁচগুণ বৃদ্ধি পায়। খৰচ ৩২৬ কোটি টকা বৃদ্ধি হ’লেও নতুন নিবিদা আহ্বান কৰা হোৱা নাছিল। দিল্লী আৰক্ষীৰ দুৰ্নীতি নিবাৰক শাখাই জানিবলৈ দিয়া মতে, ঘটনাৰ তদন্ত অব্যাহত থকাৰ লগতে বিভিন্ন আৰ্থিক নথি-পত্ৰ পৰীক্ষা কৰা হৈছে।
জানিব পৰা মতে, ধন আবণ্টন আৰু এই নিৰ্মাণ প্ৰকল্পসমূহ ৰূপায়ণৰ প্ৰক্ৰিয়াটোক কেন্দ্ৰ কৰি একাধিক স্তৰত স্বচ্ছতাৰ অভাৱ আছিল। প্ৰসংগক্ৰমে দিল্লীৰ আপ চৰকাৰে শিক্ষাখণ্ডত বিপ্লৱ আনিব বুলি দাবী কৰি নিজৰ সফলতাক বাৰে বাৰে উজ্জ্বল কৰি তুলিছে যদিও এইবাৰ সেই খণ্ডত দুৰ্নীতিৰ গুৰুতৰ অভিযোগ উত্থাপন হৈছে। এই ঘটনাই ৰাজনৈতিক মহলতো প্ৰতিক্ৰিয়াৰ সৃষ্টি কৰিছে। বিজেপি নেতাসকলে এই প্ৰশ্ন উত্থাপন কৰিছে, "শিক্ষা বিপ্লৱৰ আঁৰত লুকাই আছিল নেকি দুৰ্নীতিৰ বিস্ফোৰণ?" ইয়াৰ প্ৰত্যুত্তৰত আপ নেতাসকলে এই বিষয়ত এতিয়ালৈকে কোনো মন্তব্য কৰা নাই। অৱশ্যে পৰ্যবেক্ষকৰ মতে ছিছ’দিয়া আৰু জৈনৰ বিৰুদ্ধে এই নতুন এফআইআৰ কেজৰিৱাল চৰকাৰৰ ভাবমূর্তিৰ ওপৰত এক বৃহৎ আঘাত৷