নগাঁওঃ মানসিকভাৱে বিকাৰগ্ৰস্ত, অসহায় বৃদ্ধ-বৃদ্ধা, অসহায়ভাৱে ঘূৰি ফুৰা আৰু পিতৃ-মাতৃ তথা এচিড আক্ৰমণত আহত হোৱা যুৱতীক আইনী সাহাৰ্য প্ৰদানৰ বাবে নগাঁও জিলা আইন সেৱা প্ৰাধিকাৰীয়ে বিশেষ ব্যৱস্থা গ্ৰহণ কৰি আহিছে। এই মৰ্মে, সময়ে সময়ে নগাঁও জিলা আইন সেৱা প্ৰাধিকাৰীয়ে জিলাখনৰ বিভিন্ন প্ৰান্তত ৰাইজে যাতে আইন সাহাৰ্য লাভ কৰিব পাৰে তাৰ বাবে সজাগতা সভাকে ধৰি বিভিন্ন পদক্ষেপ গ্ৰহন কৰি আহিছে।
মঙলবাৰে নগাঁও আদালত ভৱনৰ সভাকক্ষত অনুষ্ঠিত এক সংবাদমেলত এই কথা প্ৰকাশ কৰি নগাঁও জিলা আইন সেৱা প্ৰাধিকাৰীৰ সম্পাদিকা প্ৰনিতা মাৰাঙে জানিবলৈ দিয়ে যে নগাঁও আৰু হোজাই জিলাত বিগত সময়চোৱাত উল্লেখিত লোকসকলক বিনামূলীয়া আইনী সাহাৰ্য দিয়াৰ লগতে তেওঁলোকে যাতে সুচল জীৱন যাপন কৰিব পাৰে তাৰো পদক্ষেপ গ্ৰহণ কৰি অহা হৈছে। মাৰাঙে লগতে কয় যে নগাঁও আৰু হোজাই জিলা দুখন অধিক জনবহুল জিলা হিচাপে চিহ্নিত। সেয়ে আমি এই জিলা দুখনৰ সমাজত নিজ পৰিয়ালৰ দ্বাৰা নিৰ্যাতিত দৰিদ্ৰ, মানসিকভাৱে বিকাৰগ্ৰস্ত আৰু দিব্যাঙ্গ লোকসকলক জিলা ন্যায় সেৱা প্ৰাধিকাৰীয়ে সময়ে সময়ে উদ্ধাৰ কৰাৰ লগতে পুনৰ সংস্থাপনৰ ব্যৱস্থা কৰি আহিছে। তদুপৰি বিভিন্ন শিক্ষানুষ্ঠানৰ ছাত্ৰ-ছাত্ৰীক আইন সম্পৰ্কীয় শিক্ষা প্ৰদান কৰি অহা হৈছে৷ এই সংবাদমেলতে এই লোকসকলৰ কল্যাণৰ বাবে অধিক কাম কৰাৰ লক্ষ্যৰে চাৰিটা প্ৰকল্পৰ শুভাৰম্ভ কৰে প্ৰণিতা মাৰাঙে।
উক্ত প্ৰকল্প কেইটা হৈছে অনুভুতি, স্নেহ বন্ধন, নতুন সপোন আৰু পোহৰ। জিলা আইন সেৱা প্ৰাধিকাৰীৰ দহ গৰাকী অধিবক্তা উপস্থিত থকা সংবাদ মেলখনত প্ৰনিতা মাৰাঙে উল্লেখ কৰা মতে মানসিকভাৱে বিকাৰগ্ৰস্ত লোকক উদ্ধাৰ কৰি আনি তেওঁলোকক চিকিৎসা প্ৰদানৰ লগতে মৰম চেনেহৰ জড়িয়তে এই লোকসকলক সুস্থ কৰি তোলাৰ প্ৰয়াস কৰা হ'ব। স্বেহ বন্ধন প্ৰকল্পৰ জড়িয়তে অসহায় বৃদ্ধ আৰু বৃদ্ধা লোক সকলক আইনী সাহাৰ্য প্ৰদান কৰাৰ লগতে তেওঁলোকক সুস্থভাৱে জীয়াই থকাৰ ব্যৱস্থা কৰা হ'ব।
ৰঙীন প্ৰকল্পৰ জৰিয়তে অসহায়ভাৱে ৰাস্তাই ঘাটে ঘুৰি ফুৰা পিতৃ-মাতৃ নোহোৱা শিশু সকলক উদ্ধাৰ কৰি তেওঁলোকক শিক্ষাৰ অধিকাৰ, মৌলিক অধিকাৰ আদি প্ৰদানৰ ব্যৱস্থা কৰা হ'ব আৰু পোহৰ প্ৰকল্পৰ জড়িয়তে এচিড আক্ৰমনত আক্ৰান্ত হোৱা যুৱতী সকলক চিকিৎসা ব্যৱস্থাৰ জৰিয়তে তেওঁলোকক সঠিক দিশত আগুৱাই নিবলৈ ব্যৱস্থা কৰা হ'ব।
সংবাদমেলত প্ৰনিতা মাৰাঙে ধৰ্ষন আদিৰ দৰে ঘটনাত ক্ষতিগ্ৰস্তক জিলা আইন সেৱা প্ৰাধিকাৰীৰ সহায় কৰাৰ কথাও উল্লেখ কৰে। সংবাদমেলত জিলা আইন সেৱা প্ৰাধিকাৰীৰ দহ গৰাকী পেনেল অধিৱক্তা সদস্য ক্ৰমে ৰূপালী গোস্বামী, ছাহনাজ চুলতানা, মুকুল প্ৰসাদ বৰঠাকুৰ, জেছমিন বেগম, মল্লিকা শৰ্ম্মা, পিংকু গোস্বামী, দণ্ডধৰ হাজৰিকা, দিপাংকৰ হাজৰিকা, দিব্য প্ৰসাদ বৰা আৰু চাহিনা খানমৰ ওপৰি অৰ্ধআইনী সহায়ক ক্ৰমে দ্বীপেন শইকীয়া, পংকজ শৰ্মা আৰু আশ্বাদুল ইচলাম মুল্লা উপস্থিত থাকে।
অনুষ্ঠানটিৰ লগত সংগতি ৰাখি কনক হাজৰিকা, চন্দন জ্যোতি বৰা, মিজু বৰা, তপন কুমাৰ বৰা, দিব্যজ্যোতি বৰুৱা, জয়ন্ত মূদৈ, ভাস্কৰ জ্যোতি শইকীয়া, অজিত শইকীয়া, দেবজিত হাজৰিকা, দিলদাৰ হুছেইনকে প্ৰমুখ্য কৰি নগাঁও জিলাৰ প্ৰায় কুৰি গৰাকী সাংবাদিকক গামোছা, কলমেৰে সম্বৰ্ধনা জনোৱা হয়৷