দেৰগাঁওঃ মানৱ সম্পদ গঢ়াৰ খনিকৰ শিক্ষক-শিক্ষয়িত্ৰীৰ নিৰপত্তা এতিয়া চিন্তাৰ কাৰণ হৈ পৰিছে৷ বিগত বছৰটোত বিশেষকৈ এক বৰ্বৰ তথা পাশৱিক হত্যাকাণ্ডৰ বলি হৈছিল হোজাই জিলাৰ যমুনামুখৰ এগৰাকী শিক্ষয়িত্ৰী৷ বিদ্যালয় ছুটী হোৱাৰ পিছত ঘৰলৈ আহি থকা অৱস্থাতে আদ বাটতে দলৱদ্ধ ধৰ্ষণ কৰি হত্যা কৰি মৃতদেহ কপিলী নৈত উটুৱাই দিয়াৰ দৰে এক জঘন্য কাণ্ড সংঘটিত হৈছিল৷
এই ঘটনাই ৰাজ্যত চাঞ্চল্যৰ সৃষ্টি কৰিছিল৷ যমুনামুখ আৰক্ষী থানাৰ অন্তৰ্গত চাংজুৰাই গাওঁ ইলাচি দেউৰী প্ৰাথমিক বিদ্যালয়ৰ প্ৰধান শিক্ষয়িত্ৰী অৰ্ণমাই বৰা(৫৫)ৰ মৃতদেহ বিয়লি কপিলী নদীত উদ্ধাৰ হয়৷ বছৰটোত যেন সেই ঘটনাৰ পৰাই আৰম্ভ হৈছিল শিক্ষয়িত্ৰীক নিৰ্যাতন কৰাৰ পৰম্পৰা৷ ৰাজ্য চৰকাৰে শিক্ষকৰ ৰাজহুৱাকৈ খতিয়ান তুচ্ছ-তাচ্ছিল্য কৰিব জানে যদিও সুৰক্ষা দিয়াত হে ব্যৰ্থ হৈছে৷
কিয়নো হোজাই জিলাৰ যমুনামুখ আৰক্ষী থানাৰ অন্তৰ্গত চাংজুৰাই গাওঁ ইলাচি দেউৰী প্ৰাথমিক বিদ্যালয়ৰ প্ৰধান শিক্ষয়িত্ৰী অৰ্ণমাই বৰাক হত্যা কৰাৰ পিছত মৰিগাঁৱকে ধৰি কেইবাটাও শিক্ষয়িত্ৰীক নিৰ্যাতনৰ ঘটনা সংঘটিত হৈছে৷
পবিত্ৰ শিক্ষাদানৰ সৈতে জড়িত শিক্ষয়ত্ৰীয়ো ৰক্ষা নাপায় কিছুমান জঘন্য মানসিকতাৰ লোকৰ পৰা৷ হত্যা, অপহৰণ, ধৰ্ষণে আতংকিত কৰি ৰাখিছে শিক্ষয়ত্ৰীসকলক৷ শান্তিপূৰ্ণভাৱে ছাত্র-ছাত্ৰী সকলক দিব পৰা নাই শিক্ষা৷ তাৰ মাজতে আকৌ পোহৰলৈ আহিল চিঠিৰ জৰিয়তে ভাবুকি দিয়াৰ লগতে ধৰ্ষণ কৰাৰ ভাবুকি দিয়াৰ দৰে জঘন্য ঘটনা৷ দেৰগাওঁৰ এখন বিদ্যালয়ৰ টেট শিক্ষয়ত্ৰীক বিনয় কৰ্মকাৰ নামৰ এজন যুৱকে পত্ৰৰ জৰিয়তে ধৰ্ষণৰ কৰাৰ ভাবুকি প্ৰদান কৰে৷
অকল টেট শিক্ষয়ত্ৰী গৰাকীকে নহয়, বিদ্যালয় খনৰ প্ৰধান শিক্ষয়ত্ৰীকো দিছে ভাবুকি, ‘এজনী ন’হলে আনজনী’৷ আতংকিত দুয়োগৰাকী শিক্ষয়ত্ৰী বিদ্যালয়লৈ আহিব নোৱাৰাত দুদিনে ধৰি বন্ধ হৈ আছে বিদ্যালয়৷ ব্যাহত হৈছে পাঠদান৷ ইতিমধ্যে আৰক্ষীয়ে গ্ৰেপ্তাৰ কৰিবলৈ সক্ষম হৈছে লম্পট বিনয় কৰ্মকাৰক৷ বিনয়েও স্বীকাৰ কৰিছে ধৰ্ষণৰ ভাবুকি দিয়াৰ কথা৷ বৃহস্পতিবাৰে বিদ্যালয়ৰ সন্মুখভাগ ছাত্র-ছাত্ৰী সকলৰ অভিভাৱককে ধৰি বিদ্যালয় খনৰ সমীপৰ লোক সকলেও বিকৃত মানসিকতাৰ অভিযুক্তক উপযুক্ত শাস্তি প্ৰদান কৰাৰ দাবীত উত্তাল কৰি তোলে৷৷