কোকৰাঝাৰঃ প্ৰাথমিক শিক্ষা শক্তিশালী নহ’লে জাতীয় জীৱন, জীৱন ধাৰা কেতিয়াও শক্তিশালী নহয় । সমগ্ৰ অসমত ৬০০০ তকৈ অধিক মাতৃভাষা মাধ্যমৰ বিদ্যালয়ত এজনীয়া শিক্ষকৰে পাঠদান চলি আছে । প্ৰাথমিক শিক্ষাই যদি শক্তিশালী নহয় তেনেহলে জাতীয় জীৱনৰ ভেটি কেনেকৈ শক্তিশালী হ’ব ? এই মন্তব্য প্ৰকাশ কৰিছে আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই ।
কোকৰাঝাৰ সদৰ চহৰৰ জাংকৃথাই পথাৰত কালিৰে পৰা অনুষ্ঠিত হোৱা এবছুৰ ৪৯ সংখ্যক বাৰ্ষিক অধিৱেশন তথা সোণালী জয়ন্তী বৰ্ষ উদযাপনৰ আজি দ্বিতীয়দিনৰ কাৰ্যসূচী ” ছাত্ৰ-অভিবৰ্তনত ” উদ্বোধক হিচাপে অংশগ্ৰহণ কৰি আছুৰ মুখ্য উপদেষ্ঠা সমুজ্জ্বল কুমাৰ ভট্টাচাৰ্যই উক্ত মন্তব্য প্ৰকাশ কৰি প্ৰাক প্ৰাথমিক – প্ৰাথমিক বিদ্যালয়ৰ আন্ত:গাঁথনি উন্নতিকৰণ , ছাত্ৰ অনুপাতে শিক্ষক নিযুক্তি , পৰীক্ষা ব্যৱস্থাৰ সংস্কাৰ , ৰাজ্যিক শিক্ষা ব্যৱস্থা আকৰ্ষণীয় কৰা আৰু বিদ্যালয় মূল্যাংকন আয়োগ গঠন কৰিবলৈ দাবী উত্থাপন কৰিছে ।
