কোকৰাঝাৰঃ পৃথক কমতাপুৰ ৰাজ্য পুনৰ গঠন আৰু জনজাতিকৰণৰ দাবীত ১০ জুলাইত আক্ৰাছু(প্ৰ)য়ে আহ্বান জনোৱা ১২ ঘণ্টীয়া ৰে'লপথ অৱৰোধ কাৰ্যসূচীৰ আগমুহূৰ্তত উত্তৰ-পূৱ সীমান্ত ৰে'লৱেই আগতীয়াকৈ কেবাখনো যাত্ৰীবাহী ৰেলৰ চলাচল বাতিল কৰাক লৈ যাত্ৰীৰ মাজত প্ৰতিক্ৰিয়াৰ সৃষ্টি হৈছে।
বৰ্তমানলৈকে উত্তৰ পূৱ সীমান্ত ৰে'লৱে কৰ্তৃপক্ষই ৫৫৭৫৩ উজনিমুৱা/৫৫৭৫৪ নামনিমুৱা চিফুং যাত্ৰীৱাহী , ১৫৭৬৯ উজনিমুৱা/১৫৭৭০ নামনিমুৱা আলিপুৰদুৱাৰ লামডিং ইণ্টাৰচিটি এক্সপ্ৰেছ , ১৫৭৭১ উজনিমুৱা/১৫৭৭২ নামনিমুৱা আলিপুৰদুৱাৰ কামাখ্যা ইণ্টাৰচিটি এক্সপ্ৰেছ , ৫৫৭১৩ উজনিমুৱা/৫৫৭১৪ নামনিমুৱা নিউ জলপাইগুৰি ৰঙিয়া নিউ জলপাইগুৰি ৰে'ল কেইখন বাতিল কৰিছে।
♦ আক্ৰাছুৰ ৰে'ল অৱৰোধ কাৰ্যসূচী
♦ আগতীয়াকৈ বাতিল কেবাখনো যাত্ৰীবাহী ৰে'ল
অৰ্থাৎ ১০ জুলাইত নামনি অসমৰ মাজেৰে চলাচল কৰিবলগীয়া উজনিমুৱা আৰু নামনিমুৱা যাত্ৰীবাহী ৰে'লসমূহ বাতিল হোৱাত যাত্ৰীসকল ব্যাপক অসুবিধাৰ সন্মুখীন হোৱাটো নিশ্চিত। উল্লেখ্য যে বহুসংখ্যক চাকৰিয়াল, ব্যৱসায়ী উক্ত ৰে'লসমূহৰ নিয়মীয়া যাত্ৰী। ১০ জুলাইত উক্ত ৰেলকেইখনৰ চলাচল বাতিল কৰাত চাকৰিজীৱিকে ধৰি আন যাত্ৰী ব্যাপক অসুবিধাৰ সন্মুখীন হ'ব।
তাৰোপৰি ৰে'ল বিভাগে কেবাখনো ৰে'লৰ চলাচল নিয়ন্ত্ৰণ কৰাত যাত্ৰীসকল ব্যাপক অসুবিধাৰ সন্মুখীন হ'ব । আক্ৰাছু(প্ৰ)য়ে আহ্বান জনোৱা ১২ ঘণ্টীয়া ৰেলপথ অৱৰোধ ঘোষণা কৰাৰ পিছতেই আগতীয়াকৈ ৰে'ল বিভাগে এনেদৰে ৰে'ল চলাচল বাতিল কৰা ঘটনাই আক্ৰাছুৰ আন্দোলনৰ প্ৰতি ৰে'ল বিভাগৰ সমৰ্থন আছে নেকি তাকে লৈ এতিয়া ব্যাপক চৰ্চা আৰম্ভ হৈছে।
যি সময়ত চিৰাং জিলা প্ৰশাসনে ১৪৪ ধাৰাৰ অধীনত কিছুমান নিষেধাজ্ঞা জাৰি কৰি আক্ৰাছুৰ আন্দোলন বিফল কৰাৰ প্ৰচেষ্টাত ব্ৰতী হৈছে তেনে সময়তে উত্তৰ-পূৱ সীমান্ত ৰে'লৱেই আগতীয়াকৈ একাংশ ৰে'লৰ চলাচল বাতিল কৰা আৰু একাংশ ৰে'ল নিয়ন্ত্ৰণ কৰা ঘটনা ৰহস্যজনক বিবেচিত হৈছে।
উল্লেখ্য যে ১০ জুলাইৰ পুৱা ৫ বজাৰ পৰা চিৰাং জিলাৰ বাসুগাঁও ৰে'লৱে ষ্টেচনত পৃথক কমতাপুৰ ৰাজ্য পুনৰ গঠন আৰু জনজাতিকৰণৰ দাবীত আক্ৰাছুৱে ৰে'লপথ অৱৰোধ কৰিব। আক্ৰাছুৰ (প্ৰ)ৰ সাধাৰণ সম্পাদক গোকুল বৰ্মনে সদৰী কৰা মতে উক্ত কাৰ্যসূচী সফল কৰি তোলাৰ বাবে লাঞ্চিত-বঞ্চিত কোচ ৰাজবংশী জনতা বদ্ধপৰিকৰ আৰু ন্যায্যা প্ৰাপ্তি নোপোৱালৈকে ভৱিষ্যতেও আক্ৰাছুৱে আন্দোলন অব্যাহত ৰাখিব।
ইফালে আক্ৰাছু(প্ৰ)ৰ আহ্বানৰ প্ৰতি সঁহাৰি জনাই ইতিমধ্যে কেবাহাজাৰ কোচ ৰাজবংশী জনতাই বাসুগাঁৱৰ বিভিন্ন স্থানত বাহৰ পাতি পুৱা ৫ বজাৰ পৰা ৰে'লপথ অৱৰোধ সফল কৰি তুলিবলৈ সম্পূৰ্ণ সাজু হৈছে ।