গুৱাহাটীঃ অসম লোকসেৱা আয়োগ(এ পি এছ চি)ৰ নিযুক্তি কেলেংকাৰিৰ এজনৰ পাছত আনজন মহানায়ক জালত পৰাৰ পাছত শেহতীয়াভাৱে তিনিজন অসম অসামৰিক সেৱা (এ চি এছ)ৰ বিষয়া গ্ৰেপ্তাৰ হোৱাটোৱে উৎকোচৰ বিনিময়ত এ পি এছ চিৰ চাকৰি লোৱাসকলৰ নিদ্ৰাহৰণ কৰিছে।
লাখ লাখ টকাৰ বিনিময়ত জালিয়াতিৰে চাকৰি লোৱা এইসকলৰ বহুজনে সম্প্ৰতি গ্ৰেপ্তাৰৰ পৰা হাত সৰাৰ উদ্দেশ্য উচ্চ ন্যায়ালয়ৰ পৰা অগ্ৰিম জামিন ল’বলৈ তৎপৰ হৈ উঠিছে। ইতিমধ্যে ইয়াৰে বহুজনে অধিবক্তাৰ সৈতেও দাম দৰ কৰাৰ তথ্য পোহৰলৈ আহিছে। একাংশই এই উদ্দেশ্য গুৱাহটীতো বাহৰ পাতিছে বুলি এ পি এছ চিৰ নিযুক্তি কেলেংকাৰি গোচৰৰ তদন্তকাৰী দলৰ এক সূত্ৰই জনাইছে।
সূত্ৰটোৱে জনোৱা মতে, এনেদৰে অগ্ৰিম জামিন বিচাৰি তৎপৰতা প্ৰদৰ্শন কৰাসকলৰ অধিকাংশই এ চি এছ আৰু এ পি এছ বিষয়া। ইয়াৰে এ চি এছ বিষয়া কেইজনে ৰাজ্যৰ বিভিন্ন স্থানত অতিৰিক্ত সহকাৰী আয়ুক্ত (ই এ চি) অথবা ৰাজহ চক্ৰ বিষয়াৰূপে কাৰ্যনিৰ্বাহ কৰি আছে। একেদৰে এ পি এছ বিষয়াকেইজনে ৰাজ্যৰ বিভিন্ন স্থানত উপ-আৰক্ষী অধীক্ষক অথবা মহকুমা আৰক্ষী বিষয়াৰূপে কাৰ্যনিবাহ কৰি আছে।
আনহাতে, অগ্ৰিম জামিন বিচাৰি উদ্বাউল হোৱা আনসকলৰ মাজত বিভিন্ন বিভাগত মধ্যম পৰ্যায়ৰ বিষয়াৰূপে কাৰ্যনিৰ্বাহ কৰি থকা একাংশ আছে। তদন্তকাৰীৰ সূত্ৰটোৱে জনোৱা মতে, চকৰিৰ বাবে ৰাকেশ পাল নেতৃত্বাধীন লুণ্ঠনকাৰী চক্ৰটোৰ সৈতে ফোনত অথবা আন মাধ্যমেৰে যোগাযোগ কৰা একাংশৰ তালিকা তদন্তকাৰীৰ হাতত পৰিছে।
এইসকলৰ বহুজনে জালিয়াতিৰে এ পি এছ চিৰ লোভনীয় চাকৰি লাভ কৰিবলৈ সক্ষম হয় বুলি সূত্ৰটোৱে প্ৰকাশ কৰি কয় সম্প্ৰতি এইসকলৰ বিপদ আসন্ন।