উৰিয়ামঘাটঃ জাতি, মাটি ভেটিৰ সুৰক্ষাৰ প্ৰতিশ্ৰুতি দি অসমীয়াৰ ভোট লৈ চৰকাৰ গঠন কৰা বিজেপি, অগপ আৰু বিপিএফে এতিয়া সীমান্তত বাস কৰা অসমীয়াক পাহৰিলে৷ প্ৰতিটো দিন আতংকৰ মাজেৰে পাৰ কৰা অসম-নাগালেণ্ড সীমান্তৰ অসমীয়াই জীৱন আৰু সম্পত্তিৰ সুৰক্ষাৰ নামত হাহাকাৰ কৰিব লগা হৈছে যদিও খবৰ লবলৈ আহৰি নাই চৰকাৰৰ৷ সীমান্তৰ অসমীয়াৰ নিশা হলেই যেন সন্তান পৰিয়ালৰ চিন্তাত নিদ্ৰাহৰণ হয়৷ যেনিবা আজিও আহে নগা দুৰ্বৃত্ত৷
আজিও চলাব নেকি তাণ্ডৱ৷ তেনেই চিন্তাত দিন পাৰ কৰিব লগা হৈছে অসমীয়াই৷ যোৱা কেইবাটাও দিনৰ ভিতৰত অসম-নগালেণ্ড সীমান্তত নগাৰ অত্যাচাৰ যেন বৃদ্ধি হৈছে৷ এইবাৰ যেন বৰ ঘৰ হে পালে নগাই৷ সীমান্তৰ পৰা বহু ভিতৰলৈ সোমাই আহি অসমীয়াৰ ঘৰ জ্বলাই ভাবুকি দি নিৰ্বিঘ্নে আতৰি গ’ল নগা দুৰ্বৃত্ত৷ অসমীয়াৰ ঘৰ জ্বলাই দিয়াৰ পিছতো অসমীয়াক সুৰক্ষা দিবলৈ কোনো নাছিল সীমান্তত৷ মন্ত্ৰী, বিধায়ক, আমোলাক সুৰক্ষা দিবলৈ শ-শ অৰ্ধসামৰিক বাহিনী, আৰক্ষী আছে যদিও সীমান্তৰ অসমীয়াক সুৰক্ষা দিবলৈ কোনো নাই৷
