কাজলগাঁওঃ অসম আৰক্ষীৰ অতিৰিক্ত আৰক্ষী সঞ্চালক প্ৰধান কুলধৰ শইকীয়াই আজি বিটিএডিৰ চিৰাং জিলা ভ্ৰমণ কৰি আইন-শৃংখলাজনিত পৰিস্থিতিৰ বুজ লয়৷ চিৰাং জিলা আৰক্ষী অধীক্ষকৰ কাৰ্যালয়ত অতিৰিক্ত আৰক্ষী সঞ্চালক প্ৰধান কুলধৰ শইকীয়াই বিটিএডিৰ আই জি পি অনুৰাগ আগৰৱালা, কোকৰাঝাৰ, বঙাইগাঁও আৰু চিৰাং জিলাৰ আৰক্ষী অধীক্ষকৰ সৈতে আলোচনাত মিলিত হয়৷
নিৰাপত্তা আৰু উগ্ৰপন্থী গতি বিধি সন্দৰ্ভত আলোচনা কৰে অতিৰিক্ত আৰক্ষী সঞ্চালক প্ৰধানগৰাকীয়ে। প্ৰায় দুঘন্টা ধৰি অনুষ্ঠিত হয় ৰুদ্ধধাৰ বৈঠক। বৈঠকৰ অন্ততঅতিৰিক্ত আৰক্ষী সঞ্চালক কুলধৰ শইকীয়াই সংবাদ মাধ্যমৰ সৈতে মুখামুখি হৈ চিৰাং, কোকৰাঝাৰ, বঙাইগাঁও তিনিখন জিলাত বিভিন্ন আন্দোলনৰ কাৰ্যসূচী দেখিবলৈ পোৱা গৈছে বুলি কৈ বিশেষকৈ ৰেল অৱৰোধ, বন্ধ অৱৰোধ আদি কাৰ্যসূচীৰ সৈতে মোকাবিলা কৰিবলৈ নিৰাপত্তা বাহিনীৰ প্ৰয়োজন সন্দৰ্ভত আলোচনা কৰা বুলি কয়।
উগ্ৰপন্থী সংগঠন এন ডি এফ বি (ছ) আৰু ইয়াৰ দুৰ্ধৰ্ষ পলাতক নেতাসকলৰ তৎপৰতা, ৰুজু হৈ থকা গোচৰ সমূহৰ পৰ্য্যালোচনা, আইন হাতত তুলি লোৱা, বন্ধ সংস্কৃতি, গোৱালপাৰা জিলাৰ বৰ্তমান পৰিস্থিতি আৰু অইন জিলাত ইয়াৰ প্ৰভাৱ সম্পৰ্কে আলোচনা হোৱা বুলি উল্লেখ কৰে আৰক্ষী বিষয়াগৰাকীয়ে ৷
আনহাতে ফেচবুক সন্দৰ্ভতো মতামত প্ৰকাশ কৰে অতিৰিক্ত আৰক্ষী সঞ্চালক প্ৰধানগৰাকীয়ে৷ সাম্প্ৰতিক সময়ত সামাজিক মাধ্যম ফেচবুকত বিভিন্ন লোকে সাম্প্ৰদায়িক বিষয় সমূহক লৈ প্ৰচাৰৰ বিষয়েও অসম আৰক্ষী সজাগ বুলি কয় শইকীয়াই৷
ফেচবুকত বে-আইনী কথা-বতৰা প্ৰচাৰ কৰা কেইবাজনো লোকক অসম আৰক্ষীয়ে গ্ৰেপ্তাৰ কৰি শাস্তি দিয়া বুলিও তেওঁ সদৰী কৰে। "ফেচবুক সামাজিক মাধ্যম। ইয়াক সামাজিক মাধ্যম হৈ থাকিবলৈ দিয়ক।"- কোনো লোকে সাম্প্ৰদায়িক প্ৰচাৰ নতুবা সংঘৰ্ষ লগোৱাৰ কামত ইয়াক ব্যৱহাৰ কৰিব বিচাৰিলে আৰক্ষীয়ে উচিত পদক্ষেপ ল'ব বুলি স্পষ্ট কৰি দি এইদৰে কয় অতিৰিক্ত আৰক্ষী সঞ্চালক প্ৰধান শইকীয়াই৷