বটদ্ৰৱাঃ অৱশেষত নগাঁও জিলা আইন সেৱা প্ৰাধিকৰণে দায়িত্ব ল’লে আত্মীয়-স্বজনৰপৰা নিৰ্যাতিত হৈ আশ্ৰয়হীন হোৱা গোলোক ডেকাৰ। প্ৰায় শত বৰ্ষ গৰকা মৰিগাঁৱৰ মিকিৰভেটাৰ লুঙামুখৰ গোলোক ডেকা নামৰ অবিবাহিত বৃদ্ধজনক ভতিজাকহঁতে অত্যাচাৰ কৰি উলিয়াই দিছিল ঘৰৰপৰা আৰু ভাগিনীয়েকে আনি এৰি থৈ গৈছিল ৰহাৰ কামগাঁৱৰ এটা মনসা মন্দিৰত।
ইফালে, দুদিনৰ পাছত বৃদ্ধগৰাকীক আত্মীয়সকলে লৈ যাব বুলি কৈছিল যদিও, তেওঁক নিবলৈ কোনো নহাত আশ্ৰয় দিছিল মনসা মন্দিৰটোৰ গৰাকী খগেন ডেকাই। পাছত খগেন ডেকাই বৃদ্ধজনৰ পৰিয়ালৰ লগত যোগাযোগ কৰাত পৰিয়ালৰ লোকে ওলোটাই খগেন ডেকাক ককৰ্থনা কৰি গোলাক ডেকাক বেলেগ ঠাইলৈ পঠিয়াই দিবলৈ কৈছিল।
ইয়াৰ পাছত খগেন ডেকা আৰু তেওঁৰ পত্নীয়ে ৰোগীয়া বৃদ্ধগৰাকীক শুশ্ৰূষা কৰি সুস্থ কৰি প্ৰায় চাৰি মাহ নিজৰ ঘৰতেই আশ্ৰয় দিলে। উল্লেখ্য যে, এই সম্পৰ্কত বিভিন্ন সংবাদ মাধ্যমত বাতৰিও প্ৰকাশ পাইছিল। বৃদ্ধ বয়সত গোলোক ডেকাৰ এনে কৰুণ কাহিনীৰ খবৰ লাভ কৰি তেওঁক সহায় কৰিবলৈ আগুৱাই আহিল নগাওঁ জিলা আইন সেৱা প্ৰাধিকৰণ।
বৃহস্পতিবাৰে প্ৰাধিকৰণৰ হৈ অধিবক্তা ৰূপালী গোস্বামী আৰু চেহনাজ চুলতানাই ৰহা আৰক্ষীৰ সহযোগত বৃদ্ধগৰাকীক লৈ যায় আইন সেৱা প্ৰাধিকৰণৰ তত্বাৱধানলৈ।