আব্দুল বাৰেক, বিশ্বনাথ চাৰিআলিঃ শংকৰ-আজানৰ দেশ অসমক লৈ অসমীয়া জাতিয়ে বহু চিঞৰিছে যদিও শংকৰ-আজানৰ নাম একাংশই ৰবৰেৰে মচিদিব বিছাৰিছে। এই মন্তব্য সাংবাদিক তথা সমাজকৰ্মী মনজিৎ মহন্তৰ|

দৰাচলতে অসমৰ ভাষিক সংখ্যালঘু লোকসকলৰ আৰ্থ-সামাজিক, সাংস্কৃতিক আৰু ৰাজনৈতিক অধিকাৰ তথা বিভিন্ন সমস্যাৱলীৰ লগতে বিভিন্ন জাতি-জনগোষ্ঠীৰ উন্নয়নৰ হকে আপোচবিহীনভাৱে মাত মাতি অহা অসমৰ অন্যতম জাতীয় সংগঠন অসম সংখ্যালঘু সংগ্ৰাম পৰিষদ, চমুকৈ ASSPৰ সপ্তম কেন্দ্ৰীয় প্ৰতিষ্ঠা দিৱস সোমবাৰে দিনযোৰা বৰ্ণাঢ্য কাৰ্যসূচীৰে বিশ্বনাথ জিলা সমিতিৰ উদ্যোগত অনুষ্ঠিত হৈ যায়।

পুৱা ৯:৩০ বজাত পৰিষদৰ পতকা উত্তোলনৰ জৰিয়তে কাৰ্যসূচী আৰম্ভ কৰা হয়। দিনৰ ১ বজাৰপৰা অনুষ্ঠিত হোৱা মুকলি সভাত বিশ্বনাথ জিলা সংখ্যালঘু সংগ্ৰাম পৰিষদৰ সভাপতি আব্দুল হাকিম চিকদাৰ আৰু সাধাৰণ সম্পাদক নাজিৰ আহমেদে আঁত ধৰা সভাখনত সভাপতিত্ব কৰে  পৰিষদৰ কেন্দ্ৰীয় সভাপতি আব্দুল আজিজ আৰু উদ্দেশ্য বাখ্যা কৰে সাধাৰণ সম্পাদক মহম্মদ আলি খলিফাই।

এই সভাত মুখ্য অতিথি হিচাপে উপস্থিত থাকি বিশিষ্ট মহন্তই কয় যে হিন্দু-মুছলমানৰ লেবেল দিয়া উচিত নহয়। শংকৰ-আজানৰ দেশ অসমক লৈ অসমীয়া জাতিয়ে বহু চিঞৰিছে যদিও শংকৰ-আজানৰ নাম একাংশই ৰবৰেৰে মচি দিব বিছাৰিছে।

বৰ্তমানৰ বিজেপি চৰকাৰখনে ভাৰতীয় সংবিধানক ভৰিৰে মোহাৰি গণতন্ত্ৰক হত্যা কৰিব বিচাৰিছে। এই ক্ষেত্ৰত মাত মাতিবলৈ গ’লেই ৰাষ্ট্ৰদ্ৰোহীৰ গোচৰ জাপি দিয়ে। নৰেন্দ্ৰ মোডীৰ পাঁচ বছৰ আগত থকা সম্পত্তিতকৈ বৰ্তমান ৫২ শতাংশ বৃদ্ধি হৈছে। অসম চৰকাৰখনে হিন্দু-মুছলমানক ভাগ-ভাগ কৰিব বিছাৰিছে।

সৰ্বানন্দ সোণোৱাল আৰু হিমন্ত বিশ্ব শৰ্মাৰ দৰে 'ধুৰন্ধৰ’, মেৰুদণ্ডহীন নেতাসকলে অসমীয়া জাতিক ধ্বংস কৰিব বিচাৰিছে। অসমীয়া জাতিৰ গৌৰৱ, স্বাভিমানক ধূলিস্যাৎ কৰি পেলাইছে। 
সংখ্যালঘু লোকসকলক ৰাজনৈতিকভাৱে সচেতন হ'বলৈ আহ্বান জনাই তেওঁ লগতে কয় যে অসমীয়া  জাতি আৰু ভাষা-সংস্কৃতি একমাত্ৰ চৰ অঞ্চলৰ ধৰ্মীয় সংখ্যালঘুসকলেহে জীয়াই ৰাখিছে। 

১৯৭১ চনৰ ২৪ মাৰ্চৰ পাছত অহা সকলো বিদেশী অসমৰপৰা বিতাড়ন হ’ব লাগিব আৰু ’৭১ চনৰ আগতে অসমলৈ অহা সকলো লোকক ৰাষ্ট্ৰীয় নাগৰিক পঞ্জীত নাম অন্তৰ্ভুক্ত কৰিব লাগিব। বিদেশীৰ নামত স্বদেশীক হাৰাশাস্তি কৰিলে আমি কেতিয়াও বহি নাথাকোঁ। বিদেশীৰ নামত স্বদেশীক মাৰিব  বিচাৰিলে আগতে আমাক মাৰিব লাগিব।

হিমন্ত বিশ্ব শৰ্মাৰ এতিয়া নাজল-নাথল অৱস্থা হৈছে। যাৰ কাৰণে ৰাস্তাই-ঘাটে, বজাৰে-পোহাৰে নৃত্য প্ৰদৰ্শন কৰি আছে। অসমক বুজি পোৱা আৰু অসমৰ কাৰণে কান্দিব জনা নেতা আমি আমাৰ  মাজৰপৰাই উলিয়াব লাগিব।

এক প্ৰকাৰ তীব্ৰ বাক্যবানেৰে অসম চৰকাৰ তথা কেন্দ্ৰীয় চৰকাৰৰ লগতে দেশৰ প্ৰধানমন্ত্ৰীগৰাকীক থকাসৰকা কৰে মনজিৎ মহন্তই|

উক্ত অনুষ্ঠানত পৰিষদৰ কেন্দ্ৰীয় উপদেষ্টা নাজিৰ হুছেইন সৰকাৰ, সাধাৰণ সম্পাদক মোৱাজ্জেম হুছেইন, শ্বেস আব্দুল হামিদ, সাংগঠনিক সম্পাদক জাকিৰ সৰকাৰ, বিশ্বনাথ জিলা নিৰ্বাচনী বিষয়া আবুল কালাম, সংগ্ৰামী যুৱ ছাত্ৰ পৰিষদৰ সহকাৰী সাধাৰণ সম্পাদক দিব্যজ্যোতি বৰুৱা, জনসেৱা পৰিষদৰ সভাপতি ইছফাকুল হুছেইন, বিশ্বনাথ জিলা টাইপাৰ সভাপতি ৰাজীৱ গগৈ, নেমছুৰ শোণিতপুৰ জিলা সভাপতি আজনুৰ হুছেইন, বিশ্বনাথ জিলা সংখ্যালঘু সংগ্ৰাম পৰিষদৰ উপদেষ্টা  জৈনুদ্দিন আহমেদ, সংগ্ৰাম পৰিষদৰ কেন্দ্ৰীয় উপ-সভাপতি আব্দুল মুনাফ চৌধুৰকে ধৰি প্ৰায় তিনি শতাধিক ৰাইজ উপস্থিত থাকে।