বিহালীঃ বিশ্বনাথ জিলাৰ উপায়ুক্তৰ সভাকক্ষত মঙলবাৰে আয়োজিত এক বিশেষ অনুষ্ঠানত জিলাখনৰ জ্যেষ্ঠ অতিৰিক্ত উপায়ুক্ত পাৰভেজ আমিনক বিদায় সম্বৰ্ধনা জ্ঞাপন কৰা হয়।
এগৰাকী দক্ষ প্ৰশাসনিক বিষয়াৰূপে সুনাম থকা অসম অসামৰিক সেৱাৰ বিষয়াগৰাকীয়ে বিশ্বনাথৰ অতিৰিক্ত উপায়ুক্তৰূপে সুদীৰ্ঘ কাল সুখ্যাতিৰে কাৰ্যনিৰ্বাহ কৰিছিল। প্ৰশাসনীয় যিকোনো জটিল সমস্যাৰ তাৎক্ষণিক আৰু বস্তুনিষ্ঠ সমাধানৰ ক্ষেত্ৰত তেওঁৰ দক্ষতা আছিল অতুলনীয়।
উপায়ুক্ত পৱিত্ৰ ৰাম খাউণ্ডৰ সভাপতিত্বত অনুষ্ঠিত কালিৰ বিদায় সভাত বহুকেইগৰাকী বিষয়া-কৰ্মচাৰীয়ে বিদায়ী বিষয়াগৰাকীৰ সান্নিধ্য ৰোমন্থন কৰাৰ লগতে তেওঁৰ গুণৰাজি স্মৰণ কৰে।
আনহাতে উক্ত অনুষ্ঠানত উপায়ুক্তৰ কাৰ্যালয়ৰ লগতে বিভিন্ন বিভাগৰ তৰফৰপৰা তেওঁক ফুলাম গামোচা, শৰাই আৰু অন্যান্য উপহাৰেৰে বিদায় সম্বৰ্ধনা জনোৱা হয়। উল্লেখ্য যে, আগন্তুক লোকসভা নিৰ্বাচনৰ পৰিপ্ৰেক্ষিতত শ্ৰীযুত আমিনক পশ্চিম কাৰ্বি আংলং জিলাৰ অতিৰিক্ত উপায়ুক্তৰূপে বদলি কৰা হৈছে।