দিগন্ত বৰ্মণ, বৰনৰ্দ্দীঃ নলবাৰী জিলাৰ ঘগ্ৰাপাৰৰ কটকীয়া গাঁও নিৱাসী তথা বড়িগোগ বনভাগ ব্লক কংগ্ৰেছৰ সম্পাদক, প্ৰাক্তন ছাত্ৰ নেতা, শিক্ষক ৰবীন কলিতা (৪৩)ৰ শনিবাৰে নিশা ১১ মান বজাত  নিজ গৃহত মৃত্যু হয়।

কলিতাই দীৰ্ঘদিন ধৰি কেইবাটাও জটিল ৰোগত আক্ৰান্ত হৈ চিকিৎসাধীন হৈ আছিল। কলিতাৰ মৃত্যুৰ বাতৰিৰ পাছত বিভিন্ন দল-সংগঠনৰ মূৰব্বীকে ধৰি ঘগ্ৰাপাৰ আঞ্চলিক ছাত্ৰ সন্থা, বড়িগোগ বনভাগ ব্লক কংগ্ৰেছৰ সভাপতি ভূৱনেশ্বৰ কলিতা, প্ৰাক্তন সভাপতি তবিবৰ ৰহমান, ঘগ্ৰাপাৰ মণ্ডল কংগ্ৰেছৰ বিষয়-ববীয়া, গোপীনাথ বৰদলৈ জাতীয় বিদ্যালয় শিক্ষকবৃন্দকে ধৰি অনেকজনে শেষ শ্ৰদ্ধা নিবেদন কৰে।

ঘগ্ৰাপাৰ অঞ্চলটোৰ বিভিন্ন অনুষ্ঠান-প্ৰতিষ্ঠাৰ সৈতে ওতপ্ৰোতভাৱে জড়িত ৰবীন কলিতা ছাত্ৰ অৱস্থাত ঘগ্ৰাপাৰ আঞ্চলিক ছাত্র সন্থাৰ গুৰু দায়িত্ব বহন কৰিছিল। ইয়াৰ পাছত তেওঁ ঘগ্ৰাপাৰ যুৱ কংগ্ৰেছৰ সভাপতি দায়িত্ব ভাৰ গ্ৰ্হণ কৰাৰ উপৰি বড়িগোগ বনভাগ ব্লক কংগ্ৰেছৰ সম্পাদক আছিল।

উচ্চ শিক্ষিত যুৱকজনৰ অকাল মৃত্যুত প্ৰাক্তন বিধায়ক মদন কলিতা, ঘগ্ৰাপাৰ আঞ্চলিক ছাত্র সন্থা, ঘগ্ৰাপাৰ প্ৰেছ ক্লাব, কটকীয়া গাঁও উন্নয়ন সমিতি, অগপ, বিজেপি, হিন্দু জাগৰ মঞ্চ ঘগ্ৰাপাৰ আঞ্চলিক সমিতি আদিয়ে শোক প্ৰকাশ কৰে।

কলিতা মৃত্যুৰ সময়ত তিনিজন ককায়েক, চাৰিগৰাকী বায়েক-ভনীসহ বহুজনক ইহসংসাৰত এৰি যায়।