দিগন্ত বৰ্মণ, বৰনৰ্দ্দীঃ নলবাৰী পৌৰ সভাৰ এলেকাৰ মালিকুছিৰ এটি বিধ্বস্ত পথৰ বাবে সোমবাৰে বাৰে প্ৰতিবাদমুখৰ হৈ পৰে স্থানীয় মহিলাসকল।
উল্লেখ্য যে পৌৰ সভাৰ দায়িত্বজ্ঞানহীনতাৰ বাবেই বাৰিষা আহিলেই এজাক বৰষুনতেই ৰাইজে যমৰ যাতনা ভুগি আহিব লগা হৈছে।
দীৰ্ঘদিন ধৰি নলবাৰী পৌৰসভাৰ অন্তৰ্গত ২ নং ৱাৰ্ডৰ বাসিন্দাসকলে দুৰ্ভোগ ভুগি অহাৰ পাছত সোমবাৰে অতিষ্ঠ হৈ হাতে হাতে কোৰ আৰু জাকৈ লৈ ৰাজপথলৈ ওলাই আহি প্ৰতিবাদ সাব্যস্ত কৰে।
উল্লেখ্য যে, চহৰৰ মালিকুছি অঞ্চলৰ যামিনী চ'কৰপৰা কলেজ-ৰোড ব্লক চাৰিআলি চ'কলৈ যোৱা সংযোগী পথটোৰ বিধ্বস্ত ৰূপত অতিষ্ঠ হৈ ৰাজপথলৈ ওলাই আহি প্ৰায় শতাধিক মহিলাই পৌৰসভা আৰু স্থানীয় বিধায়কৰ বিৰুদ্বে বিভিন্ন শ্ল'গান দি ৰাজপথ কঁপাই তোলে।
ইয়াতেই ক্ষান্ত নাথাকি ক্ষুদ্ধ মহিলাসকলে পথত বাঁহ বান্ধি পথটো অনিৰ্দিষ্ট কাললৈ পথটো বন্ধ কৰি দিয়ে। ৰাইজৰ অভিযোগ অনুসৰি স্থানীয় ৰাইজে পথটো মেৰামতিৰ সন্দৰ্ভত নলবাৰী পৌৰ সভাক বাৰম্বাৰ অনুৰোধ কৰাৰ পাছতো গুৰুত্ব নিদিয়াত অৱশেষত এনেদৰে প্ৰতিবাদ কৰিবলৈ বাধ্য হৈ পৰে।