কোকৰৰাঝাৰঃ কালাৰ্চ টিভিৰ ৰাইজিং ষ্টাৰ ৰিয়েলিটি শ্বৰ ছয় ফাইনেলিষ্টৰ এগৰাকী নিকিতা বড়োক আজি সম্বৰ্ধনা জনায় বিটিচি প্ৰশাসনে। বি টি চিৰ সচিবালয়ৰ প্ৰেক্ষাগৃহত আজি বি টি চিৰ সাংস্কৃতিক বিভাগৰ উদ্যোগত আৰু কাৰ্য্যবাহী সদস্য বনজাৰ দৈমাৰীৰ সভাপতিত্বত অনুষ্ঠিত হোৱা সম্বৰ্ধনা সভাত নিকিতা বড়োক বিটিচিৰ উপ-মুখ্য কাৰ্যবাহী খাম্ফা বৰগয়াৰীয়ে শিল্পীগৰাকীক উষ্ম সম্বৰ্ধনা জনাই পাঁচ লাখ টকাৰ চেক প্ৰদান কৰাৰ লগতে আৰনাই, ফুলৰ থোপা আৰু মানপত্ৰ প্ৰদান কৰে।
কোকৰাঝাৰৰ বডোফা নগৰস্থিত বিটিচি সচিবালয় প্ৰেক্ষাগৃহত আয়োজিত হোৱা সম্বৰ্ধনা অনুষ্ঠানত বিটিচি প্ৰশাসনৰ পৰা সম্বৰ্ধনা গ্ৰহণ কৰি নিকিতা বড়োই সকলোৰে প্ৰতি আন্তৰিক কৃতজ্ঞতা জ্ঞাপন কৰি শিল্পীগৰাকীয়ে মঞ্চত অসমীয়া, বড়ো আৰু হিন্দী গীত গাই শুনায়।
তদুপৰি অসমৰ সকলো প্ৰতিভাৱান শিল্পীকে ৰিয়েলিটি শ্ব'ৰ অডিশ্যনত অংশগ্ৰহণ কৰিবলৈ আহ্বান জনাইছে নিকিতা বড়োৱে। ইপিনে বিটিচিৰ উপমুখ্য কাৰ্যবাহী খাম্পা বৰগয়াৰীয়ে শিক্ষা, ক্ৰীড়া আৰু সাংস্কৃতিক ক্ষেত্ৰত ৰাষ্ট্ৰীয় পৰ্যায়ত উজলি উঠা প্ৰতিভাধৰ নৱপ্ৰজন্মক অভিনন্দন জ্ঞাপন কৰি সফলতাৰ প্ৰথম ভেটি পিতৃ-মাতৃয়ে গঢ় দিয়ে বুলি মন্তব্য কৰে।
আনহাতে বিটিচি সাংস্কৃতিক বিভাগৰ কাৰ্য্যবাহী সদস্য বনজাৰ দৈমাৰীয়ে নৱপ্ৰজন্মক অনুপ্ৰেৰণা দিবলৈকে ৰাষ্ট্ৰীয় পৰ্যায়ত উজলি উঠা শিল্পীসকলক বিটিচিৰ সাংস্কৃতিক বিভাগে সম্বৰ্ধনা দি আহিছে বুলি মন্তব্য কৰি ভৱিষ্যতেও ৰাষ্ট্ৰীয় পৰ্যায়ত উজলি উঠা প্ৰতিভাধৰসকলক বিটিচিৰ তৰফৰ পৰা উৎসাহমূলক অনুদান দিব বুলি মন্তব্য কৰিছে। বিটিচি সচিবালয় প্ৰেক্ষাগৃহত আয়োজিত হোৱা আজিৰ সম্বৰ্ধনা অনুষ্ঠানত বিটিচিৰ কাৰ্যবাহী সদস্য ক্ৰমে দনেশ্বৰ গয়াৰী, অনচুমৈ খুংগুৰ বড়োকে ধৰি কেবাগৰাকী বিশিষ্ট ব্যাক্তিয়ে অংশগ্ৰহণ কৰে।