গোৰেশ্বৰঃ ঠিকাদাৰৰ মইমতালিত ৰাজপথলৈ ওলাব নোৱাৰা হৈছে মানুহ। ধূলিৰ প্ৰকোপত মুখত কাপোৰ বান্ধি ঘৰৰ পৰা ওলাব লাগে মানুহ। ৰ’দ দিলে ধূলি, আকৌ বৰষুণ দিলে পানী আৰু বোকাৰ প্ৰকোপত মানুহ এতিয়া ঘৰৰ পৰা ওলাবলৈ যেন ভয় হে কৰে। বাইহাটা চাৰিআলি-ৰামগাঁও নাগ্ৰিজুলি গড়কাপ্তানি পথ নিৰ্মাণৰ নামত ঠিকাদাৰৰ মইমতালিত এতিয়া অতিষ্ঠ হৈ পৰিছে হাজাৰ হাজাৰ লোক৷
প্ৰায় ৫০ কিঃ মিঃ দৈৰ্ঘ্যৰ পথটো এবছৰ পূৰ্বে প্ৰথম শ্ৰেণীৰ ঠিকাদাৰ প্ৰভু আগৰৱালাই পথটো নিৰ্মাণৰ দায়িত্ব লাভ কৰিছিল৷ ঠিকাদাৰগৰাকীয়ে বাইহাটা চাৰিআলিৰ পৰা অম্বৰীশনগৰলৈ পথটোৰ টুকুৰা টুকুৰিকৈ কাম কৰাৰ ফলত ৰাইজ ব্যাপক সমস্যাত পৰিছে৷ কোনো ঠাইত শিল-বালি দ’ম কৰি থোৱাৰ লগতে কোনো কোনো ঠাইত গাত কৰি থোৱাৰ ফলত গাড়ী-মটৰ দূৰৈৰ কথা খোজকাঢ়ি যোৱাৰো পৰিৱেশ নাইকিয়া হৈছে৷
পথটো জেচিবিৰে খন্দাৰ লগতে শিল-বালি পেলাই ৰখাৰ ফলত ধূলিৰ প্ৰকোপত মানুহ এতিয়া ঘৰৰ পৰা ওলাব নোৱাৰা হৈছে৷ পথটোত ওলাব নোৱাৰা হোৱাৰ লগতে প্ৰতিদিনে দূৰ্ঘটনা সংঘটিত হৈ আহিছে৷ কিছুদিন পূৰ্বে নাওকাটাত এখন যাত্ৰীবাহী বাছ বাগৰি পৰাৰ লগতে আজি পুৱাই পুনৰাই বাক্সা জিলাৰ গোৰেশ্বৰ থানাৰ অন্তৰ্গত মকুন্দপুৰৰ মৰমী চ’কত এখন যাত্ৰীবাহী বাছ পথৰ পৰা পুখুৰীত বাগৰি পৰে৷
নাওকাটাৰ পৰা গুৱাহাটী অভিমুখে আহি থকা ছুইটি নামৰ এ-এছ-০১-বিচি-৪৪৩৬ নম্বৰৰ যাত্ৰীবাহী বাছখন গোৰেশ্বৰ পোৱাৰ পূৰ্বে মৰমী চকৰ এটি মছজিদৰ সমীপৰ এটি পুখুৰীত বাগৰি পৰে। পথৰ গাতত পৰি নিয়ন্ত্ৰণ হেৰুওৱাৰ ফলতে দুৰ্ঘটনাটো সংঘটিত হয়৷ দুৰ্ঘটনাৰ পিছত অঞ্চলটোত হুৱা দুৱা-লাগে৷ স্থানীয় একাংশ যুৱকে পানীত নামি বহু কষ্টৰে যাত্ৰীসকলক উদ্ধাৰ কৰি চিকিৎসালয়লৈ প্ৰেৰণ কৰে।
প্ৰায় ৫০গৰাকী যাত্ৰী কঢ়িয়াই অনা বাছখনৰ সকলো যাত্ৰীয়ে আহত হয়৷ ইয়াৰে দহ গৰাকী যাত্ৰী গুৰুতৰভাৱে আহত হয়। আহত সকলক জিএম চি এইচলৈ প্ৰেৰণ কৰা হৈছে। ইপিনে গোৰেশ্বৰত চিকিৎসাৰ বাবে পৰ্যাপ্ত চিকিৎসক উপস্থিত নথকাৰো অভিযোগ উত্থাপন কৰে বাছখনৰ আহত যাত্ৰীসকলে। বাইহাটা চাৰিআলি-বগামাটি পথছোৱাৰ ক্ৰুটিপূৰ্ণ নিৰ্মাণ কাৰ্য চলি থকাৰ বাবেই সঘনাই পথ দুৰ্ঘটনা সংঘটিত হৈছে বুলি স্থানীয় ৰাইজে অভিযোগ কৰিছে।