চৰাইদেউঃ ৰঙালী বিহুৰ আনন্দোৎসৱৰ প্ৰাকক্ষণত সমগ্র ৰাজ্যবাসী মতলীয়া হৈ থকাৰ সময়তেই বিগত চাৰিটা দিনত ৰাজ্যৰ ভিন্ন স্থানত উজনিৰ পৰা নামনিলৈ সংঘটিত হয় কেবাটাও পথ দুৰ্ঘটনা। বাপতি সাহোন বিহুটি হেপাঁহেৰে উদযাপন কৰি থকা সময়তেই পথ দুৰ্ঘটনাই অমানিশা কঢ়িয়াই আনিলে একাধিক পৰিয়াললৈ।
ৰাজ্যৰ ভিন্ন প্ৰান্তৰ লগতে উজনিৰ চৰাইদেউ জিলাৰ মৰাণহাট থানাৰ অন্তৰ্গত মৰাণ বটামৰাত কালি সন্ধিয়া এক পথ দুৰ্ঘটনা সংঘটিত হয়। এই দুৰ্ঘটনাত নিহত হয় এজন যুৱক। প্ৰাপ্ত তথ্যমতে, কালি সন্ধিয়া প্ৰায় ৪.৩০মান বজাত মৰাণৰ পৰা সোণাৰি অভিমুখে ঘৰলৈ আহি থকা এ-এছ-০১ বি এইচ-৬২১১ নম্বৰৰ ইক’স্পৰ্ট বাহনখনে নিয়ন্ত্ৰণ হেৰুৱাই পথৰ কাষৰ এঘৰ লোকৰ দেৱালত খুন্দা মৰাত গাড়ীখনত থকা যুৱকজন গুৰুতৰভাৱে আহত হয়। আঘাতপ্ৰাপ্ত যুৱকজনক ততাতৈয়াকৈ মৰাণহাট আৰক্ষী আৰু স্থানীয় ৰাইজৰ সহযোগত চিকিৎসালয়লৈ নিয়া হয় যদিও আদবাটতে মৃত্যু হয়।
