ডিজিটেল ডেস্কঃ সুখ নাই সুখ নাই ক’তো ধৰুৱাৰ। চৌদিশে কেৱল ধাৰ আৰু ধাৰ। যেতিয়াই-তেতিয়াই ঘৰৰ দুৱাৰমুখত আহি ভিৰ কৰিছে ধাৰ পাবলৈ থকা লোকসকলে। কিন্তু ধাৰ মাৰিবলৈ টকা নাই।
ইটোৰ পিছত সিটো ব্যৱসায়ত হাত দিছে। পিছে সকলোতে দেখিছে লোকচানৰ মুখ। সেয়ে এনে পৰিস্থিতিৰ পৰা নিস্তাৰ পাবলৈ আকৌ বন্ধু এজনৰ পৰা টকা ধাৰলৈ লৈ প্লাষ্টিক ছাৰ্জাৰী কৰি মুখমণ্ডলেই সলনি কৰি পেলালে চীনৰ এগৰাকী মহিলাই।
ইমানৰ পিছতো কিন্তু চীন প্ৰশাসনৰ পৰা হাত সাৰিব নোৱাৰিলে মহিলাগৰাকীয়ে। ধৰা পৰাৰ পিছত মহিলাগৰাকীয়ে স্বীকাৰ কৰে যে টকা দিবলৈ থকা লোকসকলে যাতে চিনিব নোৱাৰে তাৰ বাবেই প্লাষ্টিক ছাৰ্জাৰীৰ আশঅৰয় লৈছিল।
চীনৰ উহান চহৰৰ ৫৯ বৰ্ষীয় ঝু নাৱান নামৰ এই মহিলাগৰাকীয়ে আৰক্ষীক আৰু জনাইছে যে ক্ৰেডিট কাৰ্ড ব্যৱহাৰ কৰি তেওঁ বেংকৰ পৰা সৰ্বমুঠ ২৫ মিলিয়ন য়ুৱান (ভাৰতীয় মুদ্ৰাৰ হিচাপত ২৩ কোটি টকা) ধাৰ লৈছিল। কিন্তু সেই ধাৰ পৰিশোধ কৰিবলৈ কোনো উপায় বিচাৰি পোৱা নাছিল মহিলাগৰাকীয়ে।
বেংকৰ লোকসকলে দিনে-নিশাই টকা বিচাৰি তেওঁৰ দুৱাৰত টুকুৰিয়াবলৈ আৰম্ভ কৰে। যেতিয়াই-তেতিয়াই ফোন কৰি টকা বিচাৰে। শেষত আদালতত বেংকে তেওঁৰ বিৰুদ্ধে ৰুজু কৰে গোচৰ।
আদালতে যেনেকৈয়ে নহওক কিয় অতি শীঘ্ৰে ঋণ পৰিশোধ কৰাৰ নিৰ্দেশ দিয়ে। অন্যাথাই কঠোৰ শাস্তিৰ সন্মুখীন হ’ব লাগিব বুলিও সকীয়াই দিয়ে। শাস্তিৰ পৰা বাচিবলৈ অৱশেষত তেওঁ ছেনঝেন চহৰলৈ পলায়ন কৰে।
তাতেই তেওঁ এজন বন্ধুৰ পৰা টকা ধাৰলৈ লৈ প্লাষ্টিক ছাৰ্জাৰী কৰে। অইনৰ পাছপ’ৰ্ট ব্যৱহাৰ কৰি তেওঁ এখন প্ৰদেশৰ পৰা আন এখন প্ৰদেশলৈ পলাবলৈ চেষ্টা অব্যাহত ৰাখে।
কিন্তু চেহেৰা সলনি কৰিও চীনা আৰক্ষীৰ চকুত ধূলি দিব নোৱাৰিলে মহিলাগৰাকীয়ে। সমগ্ৰ দেশতে মহিলাগৰাকীৰ বিৰুদ্ধে চীন আৰক্ষীয়ে অনুসন্ধান চলাই দিনদিয়েক পূৰ্বে তেওঁক গ্ৰেপ্তাৰ কৰে।
আৰক্ষীয়ে চীনৰ চৰকাৰী সংবাদ প্ৰতিষ্ঠান 'ঝিনুহা'ক জনোৱা মতে, প্লাষ্টিক ছাৰ্জাৰী কৰি নিজকে ৩০ বছৰীয়া যুৱতীলৈ সলনি কৰিছিল ৫৯ বৰ্ষীয় ঋণগ্ৰস্ত মহিলাগৰাকীয়ে। উল্লেখ্য যে শেহতীয়াকৈ ঋণ ফাকি দিয়া লোকসকলৰ বিৰুদ্ধে কঠোৰ ব্যৱস্থা গ্ৰহণ কৰিছে চীন চৰকাৰে।