ধিংঃ ধিঙৰ শ্ৰী শ্ৰী জগন্নাথ মন্দিৰত তিনিদিনীয়াকৈ উদযাপন কৰা শ্ৰী শ্ৰী বদলা পদ্ম আতাৰ ৪৭১ তম জন্ম জয়ন্তীৰ শেষৰ দিনটোত উপস্থিত থাকে মুখ্যমন্ত্ৰী সৰ্বানন্দ সোণোৱাল।
অন্তিম দিনাৰ শ্ৰী শ্ৰী বদলা পদ্ম আতাৰ বঁটা প্ৰদান অনুষ্ঠানত মূখ্য অতিথি হিচাপে উপস্থিত থাকি মুখ্যমন্ত্ৰী সৰ্বানন্দ সোণোৱালে ঋষি আৰু কৃষকৰ মানৱ জীৱনত গুৰুত্বপূৰ্ণ অৱদান আছে বুলি কয়।
কৃষিয়ে আমাক সভ্যতা আৰু ঋষিসকলে আমাক নীতি শিক্ষা দিয়ে। শংকৰদেৱ গুৰুজনাক বিশ্ব দৰবাৰত প্ৰতিষ্ঠা কৰিবলৈ অসমীয়া সকলে নামঘৰ প্ৰতিষ্ঠা কৰক লগতে নামঘোষা আৰু গুণমালা পৃথিৱীৰ বিভিন্ন ভাষালৈ অনুবাদ কৰাৰ ব্যৱস্থা গ্ৰহণ কৰক বুলিও কয় সোণোৱালে।
আনহাতে কলিয়াবৰত নিৰ্মাণ হবলগীয়া বদলা পদ্ম আতা ক্ষেত্ৰৰ বাবে ১ কোটি আৰু ধিঙৰ জগন্নাথ মন্দিৰৰ বাবে ১০ লাখ টকাৰ আৰ্থিক সাহাৰ্য্য দিয়াৰ কথা ঘোষণা কৰে সোণোৱালে।
জনাৰ্দন দেৱ গোস্বামীৰ সভাপতিত্বত অনুষ্ঠিত মুকলি সভাত বিধায়িকা আঙুৰলতা ৰাজ্যৰ বিভিন্ন সত্ৰৰ সত্ৰাধিকাৰ উপস্থিতিত মুখ্যমন্ত্ৰী সৰ্বানন্দ সোণোৱালে শ্ৰী শ্ৰী বদলা পদ্ম আতা বঁটা প্ৰদান কৰে তিতাবৰৰ শ্ৰী শ্ৰী কমলা বাৰী সত্ৰৰ সত্ৰাধিকাৰ ভৱকান্ত দেৱ গোস্বামীক। অনুষ্ঠানতোত উপস্থিত থাকে মন্ত্ৰী কেশৱ মহন্ত, বিধায়ক ৰুপক শৰ্মা, ৰমাকান্ত দৈউৰী আৰু ঋতুপৰ্ণ বৰুৱা।