ডিজিটেল ডেস্কঃ ত্ৰিপুৰাৰ মুখ্যমন্ত্ৰী ৰূপে শপত লোৱাৰ পিছতেই প্ৰথম বাৰলৈ দিল্লী ভ্ৰমণ কৰে বিপ্লৱ কুমাৰ দেৱে৷ সোমবাৰে প্ৰধানমন্ত্ৰী নৰেন্দ্ৰ মোডীক সাক্ষাৎ কৰি মুখ্যমন্ত্ৰী গৰাকীয়ে ত্ৰিপুৰাৰ বিভিন্ন সমস্যা আৰু বিশেষ পেকেজ সন্দৰ্ভত আলোচনা কৰে বুলি জানিব পৰা গৈছে৷  

বিপ্লৱ কুমাৰ দেৱে বিত্ত মন্ত্ৰী অৰুণ জেটলীকো সাক্ষাৎ কৰে৷ ৰাজ্যখনৰ বিত্তীয় অৱস্থাৰ স্থিতিৰ সম্পৰ্কে বৈঠক অনুষ্ঠিত কৰি ত্ৰিপুৰাৰ মন্ত্ৰী পৰিষদে ত্ৰিপুৰা চৰকাৰৰ ৰাজকোষ উদং বুলি অৱগত হৈছিল৷ তাৰ পিছতো ৰাজ্য খনৰ বিত্তীয় অৱস্থাৰ কথা কেন্দ্ৰীয় চৰকাৰক অৱগত কৰিবলৈ দিল্লীত উপস্থিত হয় মুখ্যমন্ত্ৰী৷
   
উল্লেখ্য যে, চলিত বিত্তীয় বৰ্ষত ৰাজ্যখনৰ ঘাটি বাজেট হৈছে ১,৫৮৮.১৯ কোটি টকা৷ এই সংকটৰ পৰা মুক্ত হ’বৰ বাবে বিত্ত মন্ত্ৰণালয়ৰ অধিকাৰীয়ে আগন্তুক তিনি দিনৰ ভিতৰত ৰাজ্যৰ বিত্তীয় স্থিতিৰ ওপৰত ৰিপৰ্ট জমা দিবলৈ কয়৷ লৰিপৰ্ট সমূহ জমা দিয়াৰ পিছতেই মুখ্যমন্ত্ৰীয়ে দিল্লীলৈ ৰাওনা হয়৷ 

কৃষি, পৰ্যটন, শিক্ষা, স্বাস্থ্য আদি সম্পৰ্কত প্ৰধানমন্ত্ৰী মোডীৰ সৈতে আলোচনা কৰে ত্ৰিপুৰৰা মুখ্যমন্ত্ৰী বিপ্লৱ কুমাৰ দেৱ আৰু উপ-মুখ্যমন্ত্ৰী জিষ্ণু দেৱ বৰ্মা উপস্থিত থাকে৷ উল্লেখ্য যে, ২৫ বছৰীয়া বাওঁমৰ্চাৰ শাসনৰ গাদী উফৰাই বিপ্লৱ কুমাৰ দেৱে ত্ৰিপুৰাত বিজেপিৰ প্ৰথমগৰাকী মুখ্যমন্ত্ৰী হিচাপে ৯ মাৰ্চত শপত গ্ৰহণ কৰিছিল৷