গুৱাহাটী: ৰাজ্যত অব্যাহত থকা পঞ্চায়ত নিৰ্বাচনৰ উত্তাপৰ মাজতে চৰম পৰ্যায়ত উপনীত হৈছে কংগ্ৰেছ আৰু ৰাইজৰ দলৰ বাকযুদ্ধ। বিজেপিৰ বিৰুদ্ধে যুঁজিবলৈ এৰি বিৰোধীৰ মাজতে খোৱা-কমোৰা লগা এই দুই দলৰ নেতাৰ হাই ভল্টেজ ড্ৰামাই গৰম কৰি ৰাখিছে পঞ্চায়ত নিৰ্বাচনকেন্দ্ৰিক বতাহ। কংগ্ৰেছ সাংসদ গৌৰৱ গগৈ আৰু ৰাইজৰ দলৰ সভাপতি তথা বিধায়ক অখিল গগৈৰ মাজত চলা অভিযোগ-প্ৰত্যাভিযোগে এতিয়া ৰাজনৈতিক মহলত তীব্ৰ চৰ্চাৰ সৃষ্টি কৰিছে।
ইফালে এই বাকযুদ্ধৰ মাজতে মাজে মাজে এণ্ট্ৰী ঘটিছে ভূপেন বৰা, দেৱব্ৰত শইকীয়াৰ দৰে নেতাৰো। বিধানসভাৰ বিৰোধী দলপতি দেৱব্ৰত শইকীয়াক লৈ শেহতীয়াকৈ অখিলে কৰা মন্তব্যৰ পিছত কংগ্ৰেছ নেতাগৰাকীয়ে আজি প্ৰদান কৰে প্ৰত্যুত্তৰ। মঙলবাৰে দিছপুৰৰ চৰকাৰী ভৱনত এক সংবাদমেল সম্বোধন কৰি দেৱব্ৰত শইকীয়াই অখিল গগৈক তীক্ষ্ণ সমালোচনা কৰি কয়, “মোক ৰাজনৈতিকভাৱে হত্যা কৰাৰ ষড়যন্ত্ৰ ৰচনা কৰা হৈছে। বিধানসভাত অখিল গগৈয়ে মোক শ্ৰুতলিপি দি নিজৰ মতে পৰিচালনা কৰাৰ চেষ্টা কৰিছিল।” তেওঁৰ অভিযোগ, এই ঘটনাৰ পিছত অখিল গগৈয়ে তেওঁৰ বিৰুদ্ধে বিভিন্ন বক্তব্য দি ৰাজনৈতিকভাৱে দুৰ্বল কৰাৰ চেষ্টা চলাই আহিছে। উল্লেখ্য যে, সোমবাৰে দেৱব্ৰত শইকীয়াই এক সংবাদমেলত অখিল গগৈৰ বিৰুদ্ধে বিজেপিৰ ‘বি টিম’ হিচাপে কাম কৰাৰ অভিযোগ উত্থাপন কৰিছিল।
ইয়াৰ প্ৰত্যুত্তৰত অখিল গগৈয়ে তীব্ৰ ভাষাৰে শইকীয়াক আক্ৰমণ কৰি কয়, “বিজেপিৰ 'এ টিম’ হিচাপে কাম কৰি আছে দেৱব্ৰত শইকীয়াই। ২০২৬ৰ জানুৱাৰীত বিজেপিত যোগদান কৰিব কংগ্ৰেছৰ জ্যেষ্ঠ নেতা দেৱব্ৰত শইকীয়াই।” এই মন্তব্যৰ পিছতেই শইকীয়াৰ প্ৰতিক্ৰিয়াই বিতৰ্কক আৰু জটিল কৰি তোলে। দেৱব্ৰত শইকীয়াই অখিল গগৈৰ এই অভিযোগক ‘হাস্যকৰ’ বুলি অভিহিত কৰি কয়, “অখিল গগৈয়ে যেনেকৈ কথাবোৰ কৈছে, যেন মই তেওঁৰ সন্মুখত MOUত চহী কৰি থৈ আহিছিলো। মোৰ বিৰুদ্ধে তেনে কিবা প্ৰমাণ দিব পাৰিলে ৰাজহুৱা জীৱন ত্যাগ কৰিম।” তেওঁ লগতে কয়, “অখিল গগৈয়ে মোৰ বিৰুদ্ধে কিয় এনে অপপ্ৰচাৰ চলাইছে ক’ব নোৱাৰো। ইয়াৰ আগেও মোৰ বিৰুদ্ধে ৰাজনৈতিক ষড়যন্ত্ৰ ৰচনা কৰা হৈছে। সমষ্টি পুনৰ নিৰ্ধাৰণৰ সময়ত মোৰ সমষ্টিৰ এলেকা কৰ্তন কৰি শিৱসাগৰৰ লগত সংযুক্ত কৰা হৈছে।”
নিজকে জন্মসূত্ৰে কংগ্ৰেছী বুলি দাবী কৰি শইকীয়াই কয়, “মই কংগ্ৰেছক ভাল পাওঁ। মই জন্মসূত্ৰে কংগ্ৰেছী। মোক ৰাজনৈতিকভাৱে দুৰ্বল কৰাৰ চেষ্টা কৰা হৈছে।” ইফালে, নামনি অসমত এইবাৰৰ পঞ্চায়ত নিৰ্বাচনত অখিল গগৈয়ে সংখ্যালঘু ভোটাৰৰ মাজত ব্যাপক জনপ্ৰিয়তা লাভ কৰিছে। তেওঁৰ সভাসমূহত হাজাৰ হাজাৰ লোকৰ সমাৱেশ দেখা গৈছে। এই সমাৱেশৰ খৰচক লৈ প্ৰশ্ন উত্থাপন কৰি দেৱব্ৰত শইকীয়াই কয়, “অখিল গগৈয়ে যেনে ধৰণেৰে বিৰাট সমাৱেশ পাতিছে অথবা প্ৰাৰ্থীক ধন বিলাইছে, সেই পইচা ক’ৰ পৰা আহিছে, সেয়া মোৰ ফালৰ পৰা প্ৰশ্ন।” তেওঁ লগতে অখিল গগৈক তীব্ৰভাৱে আক্ৰমণ কৰি কয়, “অখিল গগৈয়ে সংখ্যালঘুৰ সমৰ্থনত বিধানসভাৰ ভিতৰত বা বাহিৰত কিবা মাত মাতিছিল নেকি? অখিল গগৈয়ে ২০১৪ চনত বিজেপিক ভোট দিবলৈ আহ্বান জনাই বিজেপিক বৰপীৰা পাৰি দিয়া নাছিল জানো!”
ইফালে সংবাদমেলত বুধবাৰে অনুষ্ঠিত হ’বলগীয়া পঞ্চায়ত নিৰ্বাচনৰ অন্তিম পৰ্যায়ৰ ভোটগ্ৰহণক লৈ দেৱব্ৰত শইকীয়াই নিৰ্বাচন আয়োগক সতৰ্ক কৰি দিয়ে। তেওঁ কয়, “পঞ্চায়ত নিৰ্বাচনৰ অন্তিম পৰ্যায়ৰ ভোটগ্ৰহণত যাতে কোনো ধৰণৰ ৰিগিং অথবা ৰি-পোলৰ ব্যৱস্থা নহয়, তাৰ বাবে ব্যৱস্থা গ্ৰহণ কৰিবলৈ মই নিৰ্বাচন আয়োগক আহ্বান জনাইছো। দ্বিতীয় পৰ্যায়ত বহু চৰ-চাপৰি আৰু সংখ্যালঘু অধ্যুষিত অঞ্চলত ভোটগ্ৰহণ হ’ব। এইক্ষেত্ৰত নিৰ্বাচন আয়োগক ব্যৱস্থা ল’বলৈ আহ্বান জনাইছো।” লক্ষ্যণীয়ভাৱে, এই বাকযুদ্ধ আৰু অভিযোগ-প্ৰত্যাভিযোগে পঞ্চায়ত নিৰ্বাচনৰ পৰিৱেশক আৰু উত্তপ্ত কৰি তুলিছে। একাংশৰ মতে, বিৰোধীৰ মাজত এনে খোৱা-কামোৰাই নিৰ্বাচনত বিজেপিক লাভাম্বিত কৰিব পাৰে।