ৰঙিয়াঃ ৰঙিয়া আৰক্ষীৰ অভিযানত জালত পৰিল চাৰি বেংক ডকাইত৷ বেংক ডকাইতি কাণ্ডৰ সৈতে জড়িত চাৰি ডকাইতক বাক্সা জিলাৰ গুৱাকুছিৰ পৰা ৰঙিয়া আৰক্ষীয়ে আটক কৰিবলৈ সক্ষম হয়।
ৰঙিয়া আৰক্ষীয়ে বাক্সা আৰক্ষীৰ সহযোগত শুকুৰবাৰে নিশা বাক্সা জিলাৰ গুৱাকুছি গাঁৱত অভিযান চলাই৷ গাঁও খনৰ ডকাইটি কাণ্ডৰ সৈতে জড়িত ৰেজেক আলী নামৰ যুৱকজনক আটক কৰিবলৈ সক্ষম হয়।
ৰেজেক আলীয়ে আৰক্ষীক দিয়া ভাষ্য অনুসৰি একেখন গাঁৱৰে আবুল আলী, হজৰত আলী আৰু হাচান আলীক আটক কৰে আৰক্ষীয়ে।
অভিযান কালত ৰেজেক আলীৰ গোহালি ঘৰত পুতি থোৱা অৱস্থাত এক লাখ ৫৪ হাজাৰ টকাৰ লগতে এখন টাটা চুমু উদ্ধাৰ কৰিবলৈ সক্ষম হয় বুলি ৰঙিয়া মহকুমা আৰক্ষী বিষয়া প্ৰণৱ কুমাৰ পেগুয়ে সংবাদ মাধ্যমক জানিব দিয়ে।
আৰক্ষী বিষয়াগৰাকীয়ে জনোৱা মতে ৰঙিয়া মহকুমাৰ সোণেশ্বৰস্থিত ষ্টেট বেংক অৱ ইণ্ডিয়াৰ সোনেশ্বৰ শাখাৰ পৰা যোৱা ২০ মে’ত ডকাইট কেইজনে ২৩ লাখ টকা লুটি নিছিল৷