গুৱাহাটীঃ ২০০৪ চনত আলফাই সংঘটিত কৰা ধেমাজী কাণ্ডৰ চূড়ান্ত ৰায় প্ৰদান কৰিলে আদালতে। ৬ জন অভিযুক্তক দোষী সাব্যস্ত কৰিলে ধেমাজি জিলা ও সত্ৰ ন্যায়াধীশৰ আদালতে।
আন ৮ জনক দোষমুক্ত ঘোষণা কৰে আদালতে। মুঠ ১৫ জনৰ বিৰুদ্ধে আৰক্ষীয়ে দাখিল কৰিছিল অভিযোগনামা। ইয়াৰ ভিতৰত এজন অভিযুক্তৰ মৃত্যু হৈছিল।
২০০৪ চনৰ ১৫ আগষ্টত আলফাই সংঘটিত কৰিছিল বিস্ফোৰণ। এই বিস্ফোৰণত প্ৰাণ গৈছিল ১০ টা শিশু ৩ গৰাকী মহিলাসহ ১৩ গৰাকী লোকৰ। স্বাধীনতা দিৱসৰ উদযাপনথলীতে আলফাই চলাইছিল এই নৰসংহাৰ।
২০১১ চনত এই ঘটনাৰ আৰক্ষীয়ে দাখিল কৰা অভিযোগনামাত ১৫ অভিযুক্তৰ নাম আছিল। ২০ জুনত গোচৰটোৰ চূড়ান্ত ৰায়দানৰ দিন আছিল যদিও আদালতে স্থগিত ৰাখিছিল ৰায়। ধেমাজি বাৰ এছ’চিয়েচনৰ সম্পাদক ঘনশ্যাম লাহনৰ মৃত্যুৰ বাবে স্থগিত ৰখা হৈছিল ৰায়।
আনহাতে, দোষী সাব্যস্ত হ’ল যতীন দুৱৰী, লীলা খান, দীপাঞ্জলি গোঁহাই, মুহি সন্দিকৈ, প্ৰশান্ত ভূঞা আৰু হেমেন গগৈ। আদালতে দোষমুক্ত ঘোষণা কৰিলে জয়া চুতীয়া, মীন বৰুৱা, জিতেন চুতীয়া, অপ্সৰা বৰুৱা, গোবিন কলিতা, জয়চন্দ্ৰ চুতীয়া, চন্দ্ৰনাথ গগৈ আৰু মোহন চুতীয়াক।