গোলকগঞ্জঃ শিশু আৰু প্ৰসূতিক আৱশ্যকীয় প্ৰতিষেধক প্ৰদানৰ ক্ষেত্ৰত ধুবুৰী জিলাই শেহতীয়াভাৱে বিশেষ অগ্ৰগতি লাভ কৰি ৰাজ্যৰ ভিতৰতে শীৰ্ষস্থান অধিকাৰ কৰিবলৈ সক্ষম হৈছে। যোৱা বিত্তীয় বৰ্ষটোত লক্ষ্য নিৰ্ধাৰণ কৰা ৫১৩৮৭টি শিশুৰ বিপৰীতে জিলাখনত ৪৯০৮১টা শিশুক প্ৰতিষেধক প্ৰদান কৰা হৈছে। সফলতাৰ হাৰ ৯৬ শতাংশ।
জিলা প্ৰতিষেধক বিষয়া ড' জয়দীপ ভট্টাচাৰ্যৰ উদ্ধৃতিৰে জিলা জনসংযোগ বিষয়া বিকাশ শৰ্মাই জনোৱা মতে এই সময়ছোৱাত ১৮৬৪২গৰাকী প্ৰসূতিৰ বিপৰীতে ৯৭ শতাংশ লক্ষ্য আহৰণেৰে ১৮০২৬গৰাকীৰ টিকাকৰণ সম্পন্ন হৈছে। যোৱা মাহৰ শেষৰ ফালে অনুষ্ঠিত ৰাজ্যিক পৰ্যায়ৰ সমীক্ষাত ধুবুৰী জিলাই এই ফলাফলেৰে ৰাজ্যৰ ভিতৰত শীৰ্ষস্থান লাভ কৰিছে।
নিয়মীয়া প্ৰতিষেধক প্ৰদানৰ পৰা বাদ পৰি যোৱা শিশু আৰু প্ৰসূতিৰ বিশেষ টিকাকৰণৰ বাবে দেওবাৰৰ পৰা এসপ্তাহৰ বাবে ‘ইন্দ্ৰধনুশ’ অভিযান আৰম্ভ কৰিবলৈ লোৱা হৈছে। আজি জিলা উপায়ুক্ত কাৰ্যালয়ৰ সভাকক্ষত এই উপলক্ষে আয়োজিত এখন সভাৰ প্ৰকাশিত তথ্য অনুযায়ী এই সময়ছোৱাত নিয়মীয়া প্ৰতিষেধক লাভৰ পৰা বঞ্চিত হোৱা দুবছৰ বা তাৰ অনূৰ্ধ্বৰ ৯৭৮টি শিশু আৰু ২৫৪গৰাকী গৰ্ভৱতী মহিলাক প্ৰতিষেধক প্ৰদানৰ লক্ষ্য নিৰ্ধাৰণ কৰা হৈছে।
এই বিশেষ অভিযানত ১০৫গৰাকী এ এন এম নাৰ্ছ, ১৩৮গৰাকী আশা আৰু ৪৮৭গৰাকী অংগনৱাড়ী কৰ্মীৰ সহায় লোৱা হ’ব। ধুবুৰী জিলাৰ কোনো শিশু আৰু গৰ্ভৱতী মহিলা যাতে প্ৰয়োজনীয় প্ৰতিষেধকৰ পৰা বাদ নপৰে সেই উদ্দেশ্য এই বিশেষ অভিযান চলোৱা হ’ব বুলি জিলা তথ্য আৰু জনসংযোগ বিষয়াগৰাকীয়ে জানিবলৈ দিয়ে।