ডিব্ৰুগড়ত শুকুৰবাৰৰেপৰা যুৱ-ছাত্ৰ পৰিষদৰ কেন্দ্ৰীয় মধ্যকালীন অধিৱেশন

 | by NNO Correspondent  |  0
Printer-friendly version

ডিব্ৰুগড়ঃ ১৯৭৮ চনৰ ১২ মাৰ্চত প্ৰতিষ্ঠা হোৱা অসমৰ অন্যতম জাতীয় সংগঠন অসম জাতীয়তাবাদী যুৱ-ছাত্ৰ পৰিষদ।

জন্মলগ্নৰেপৰা অসমত পূৰ্ণ স্বায়ত্ব শাসন প্ৰৱৰ্তন, দ্বি-নাগৰিকত্ব আৰু আন্তঃৰাজ্যিক পাৰপত্ৰ ব্যৱস্থা প্ৰৱৰ্তন কৰাৰ লগতে অসমৰ খনিজ আৰু বনজ সম্পদৰ ওপৰত অসমীয়াৰ কৰ্তৃত্ব স্থাপন কৰা তথা ভূমি সম্পদ ওপৰত খিলঞ্জীয়াৰ অধিকাৰ সাব্যস্তকৰণৰ দাবীত অসম জাতীয়তাবাদী যুৱ-ছাত্ৰ পৰিষদে দীৰ্ঘদিন ধৰি গণতান্ত্ৰিক সংগ্ৰাম অব্যাহত ৰাখিছে।

তাৰোপৰি অসমৰ প্ৰতিটো সংকটৰ প্ৰতিবাদ সাব্যস্তকৰণৰ জৰিয়তে সমস্যা সমাধান কৰিবলৈ জাগ্ৰত প্ৰহৰীৰ দৰে অসম জাতীয়তাবাদী যুৱ-ছাত্ৰ পৰিষদ সজাগ আৰু সচেতন। সেই প্ৰচেষ্টাকে আগত ৰাখি অসম জাতীয়তাবাদী যুৱ-ছাত্ৰ পৰিষদৰ কেন্দ্ৰীয় মধ্যকালীন অধিৱেশনখনি অহা ১৫, ১৬ আৰু ১৭ মাৰ্চত অসম জাতীয়তাবাদী যুৱ-ছাত্ৰ পৰিষদৰ ডিব্ৰুগড় জিলা সমিতিৰ আমন্ত্ৰণমৰ্মে ডিব্ৰুগড় জিলা পুথিভঁৰালত আয়োজন কৰা হৈছে।

১৫ মাৰ্চত কাৰ্যসূচী অনুসৰি সন্ধিয়া প্ৰতিনিধি শিবিৰ উদ্বোধন কৰিব জ্যেষ্ঠ সাংবাদিক ইকবাল আহমেদে। ১৬ মাৰ্চত পুৱা পতাকা উত্তোলন কৰিব পৰিষদৰ কেন্দ্ৰীয় ভাৰপ্ৰাপ্ত সভাপতি হেমেন চক্ৰৱৰ্তীয়ে। ৯.৩০ বজাত শ্বহীদ তৰ্পণ মুকলি কৰিব পৰিষদৰ সাধাৰণ সম্পাদক পলাশ চাংমায়ে। ৯.৪৫ বজাত প্ৰয়াত সতীৰ্থসকলৰ শ্ৰদ্ধাঞ্জলি কাৰ্যসূচী মুকলি কৰিব পৰিষদৰ মুখ্য উপদেষ্টা জ্যোতিময় কলিতাই।

১১ বজাত প্ৰতিনিধিৰ সভা, ২ বজাত আহাৰ গ্ৰহণ, ৫.৩০ বজাত স্মৃতিগ্ৰন্থ উন্মোচন কৰিব ডিব্ৰুগড়ৰ বিশিষ্ট চিকিৎসক ডাঃ ৰ্নিমল কুমাৰ চাহেৱালাই। সন্ধিয়া ৬ বজাত বন্তি প্ৰজ্বলন। ১৭ মাৰ্চত প্ৰতিনিধিৰ সভাৰে কাৰ্যসূচী সামৰণি পৰিব। তদুপৰি অসম আৰু অসমীয়াৰ জাতীয় অস্তিত্ব সুৰক্ষাৰ স্বাৰ্থত সদৌ ডিব্ৰুগড়বাসীৰ লগতে শুভাকাংশী ৰাইজৰ সহায়-সহযোগিতা কামনা কৰিছে অসম জাতীয়তাবাদী যুৱ-ছাত্ৰ পৰিষদৰ কেন্দ্ৰীয় সমিতিৰ ভাৰপ্ৰাপ্ত সভাপতি হেমেন চক্ৰৱৰ্তী, সাধাৰণ সম্পাদক পলাশ চাংমাই, ডিব্ৰুগড় জিলা সমিতিৰ সভাপতি গিৰিণ চেতিয়া আৰু সাধাৰণ সম্পাদক ৰাজীৱ গগৈৰ লগতে অভ্যৰ্থনা সমিতিৰ সভাপতি ডাঃ অমৃত বৰুৱা, কাৰ্যকৰী সভাপতি চন্দন সন্দিকৈ, যুটীয়া সম্পাদক প্ৰিয়ব্ৰত গোহাঁই আৰু ভৱেন সোণোৱালে।