ডিব্ৰুগড়ঃ ডিব্ৰুগড় জিলাৰ লাহোৱাল বিধান সভা সমষ্টিৰ অন্তৰ্গত ইকৰাতলী খনিকৰ গাঁৱত বৃহস্পতিবাৰে অৰ্ধশতাধিক পুৰুষ আৰু মহিলাই মটক সমাজৰ পৰম্পৰা আৰু ৰীতি-নীতিৰে এক ইশ্বৰ ধৰ্মত ইশ্বৰৰ ওচৰত শৰণ গ্ৰহণ কৰে।
ঐতিহাসিক মায়ামৰা মদাৰখাত আৰু দিনজয় সত্ৰৰ সত্ৰাধিকাৰে ভক্তপ্ৰাণ লোকসকলক শৰণ দান কৰে। ন-শৰণীয়া সকলক গায়ন-বায়নেৰে শৰণ কাৰ্যৰ বাবে চেঁচা নদীলৈ দীঘলীয়া শাৰীৰে সহস্ৰাধিক ৰাইজে আদৰি নিয়ে। মটক সকলৰ পবিত্ৰ হিচাপে মানি অহা চেঁচা নদীত স্নান কৰি শৰণ কাৰ্যৰ বিভিন্ন নীতি-নিয়ম আৰম্ভ কৰা হয়।
শৰণ কাৰ্যসূচীত মদাৰখাত সত্ৰৰ যুৱ সত্ৰাধিকাৰ বৈষ্ণবানন্দ গোস্বামী আৰু দিনজয় সত্ৰৰ মনোজ গোস্বামী, সদৌ অমস মটক যুৱ-ছাত্ৰ সন্মিলনৰ কেন্দ্ৰীয় উপ-সভাপতি অজয় গগৈৰ লগতে কেইবাখনো গাঁৱৰ নামঘৰীয়া আৰু স্থানীয় যুৱক-যুৱতী, পুৰুষ-মহিলা উপস্থিত থাকে। শৰণ লাভ কৰাৰ পাছত পুৰুষ-মহিলা সকলে সত্ৰাধিকাৰ প্ৰভূৰ আদেশ অনুসৰি প্ৰভু ভগৱন্তৰ সেৱা কৰি যায়।