খেৰণি, কনক দেউৰী

খেৰণিঃ কাৰ্বি পৰিষদৰ প্ৰতিষ্ঠা দিৱসক লৈ ইতিমধ্যে তৎপৰ হোৱা পৰিলক্ষিত হৈছে কাৰ্বি পৰিষদৰ বিভাগীয় কাৰ্যবাহী সদস্য মঙ্গলছিং তিমুঙক। সমাগত ইং ২৩ জুনত বৰ্ণিল কাৰ্যসূচীৰে পশ্চিম কাৰ্বি আংলঙৰ ডংকামোকামত সমূহীয়াভাৱে কাৰ্বি পৰিষদে অনুষ্ঠিত কৰিব পৰিষদৰ ৬৮ সংখ্যক প্ৰতিষ্ঠা দিৱস। 

পৰিপ্ৰেক্ষিতত বুধবাৰে মুখ্য কাৰ্যবাহী সদস্য তুলিৰাম ৰংহাঙৰ পৰামৰ্শত কাৰ্যবাহী সদস্য মঙ্গলছিং তিমুঙসহ ডংকামোকাম চহৰ সমিতিৰ অধ্যক্ষ টেলিচৰাম ৰংহাং, ৱাৰ্ড কমিচনাৰসকল, হামৰেন গাঁও উন্নয়ন সমিতিৰ অধ্যক্ষ ছাৰছিং ফাংছ', প্ৰাক্তন অধ্যক্ষ বীৰেন তিচ্ছৰ উপৰিও এক বৃহৎ সজাতি দল ডংকামোকামত উপস্থিত হৈ আয়োজনস্থলী নিৰূপণ কৰে আৰু প্ৰতিষ্ঠা দিৱস পালনৰ প্ৰস্তুতিৰ পৰিকল্পনা কৰে। 

বিগত বৰ্ষসমূহত কাৰ্বি পৰিষদৰ প্ৰতিষ্ঠা দিৱস ডিফু, হামৰেন অথবা কাৰ্বি আংলঙৰ বিভিন্ন চৰকাৰী কাৰ্যালয় আদিত বিভিন্ন কাৰ্যসূচীৰে পৃথকে পৃথকে পালন কৰি আহিছিল যদিও এই বৰ্ষত কাৰ্বি আংলং আৰু পশ্চিম কাৰ্বি আংলং জিলাক একেলগে সামৰি পশ্চিম কাৰ্বি আংলঙৰ ডংকামোকামত সমূহীয়াভাৱে কাৰ্বি পৰিষদৰ ৬৮ সংখ্যক প্ৰতিষ্ঠা দিৱস পালন কৰাৰ সিদ্ধান্ত কাৰ্বি পৰিষদে গ্ৰহণ কৰিছে বুলি জানিবলৈ দিয়ে কাৰ্যবাহী সদস্য মঙ্গলছিং তিমুঙে। 

লগতে উক্ত প্ৰতিষ্ঠা দিৱসৰ দিনটোত ডংকামোকাম অঞ্চলত ৰূপায়ন কৰা অভিলাষী আঁচনিৰো শুভ উদ্বোধন কৰাৰ প্ৰক্ৰিয়া চলি থকা আৰু অনুষ্ঠানত ৰাজ্যিকমন্ত্ৰী, বিজেপিৰ বাঘা বাঘা নেতা আদিও উপস্থিত থাকিব বুলি একপ্ৰকাৰৰ পৰোক্ষ ইংগিত দিয়ে কাৰ্যবাহী সদস্য মঙ্গলছিং তিমুঙে। 

সমান্তৰালকৈ ডংকামোকামত অনুষ্ঠিত হ’বলগীয়া এই প্ৰতিষ্ঠা দিৱস উছৱমুখৰ পৰিৱেশেৰে সাফল্যমণ্ডিত কৰিবলৈ কাৰ্বি আংলঙত বসবাস কৰা প্ৰতিগৰাকী নাগৰিককে সহায় সহযোগীতা আগবঢ়াই যোৱা আৰু উল্লেখিত দিনটোত উক্ত অনুষ্ঠানত উপস্থিত থাকিবলৈ ৰাইজক সংবাদ মাধ্যমযোগে আহ্বান জনায় তিমুঙে।