♦ ধৰাশায়ী হ'ল ৭ বাৰৰ সাংসদ বীৰেণ ছিং ইংতি
ছাইদুল ইছলাম, ডিফুঃ প্ৰত্যাশিতভাৱেই পদুমফুলৰ সুবাসেৰে মোডীময় হ'ল কাৰ্বি পাহাৰ ৷
৩ নং স্বায়ত্ত শাসিত জিলাৰ ডিফু লোকসভা সমষ্টিৰ বিজেপি প্ৰাৰ্থী হৰেণছিং বে'ৰ হাতত ধৰাশায়ী হ'ল পূৰ্বৰ কংগ্ৰেছৰ ৭ বাৰৰ অপৰাজেয় প্ৰাৰ্থী বীৰেণছিং ইংতি ৷
ডিফু লোকসভা সমষ্টিৰ অন্তৰ্গত ৫ টা বিধান সভা সমষ্টি ক্ৰমে, ১৬ নং হাফলং, ১৭নং বোকাজান, ১৮নং হাওৰাঘাট, ১৯ নং ডিফু আৰু ২০ নং বৈঠালাংচ সমষ্টিৰ সকলোতেই বিজেপি প্ৰাৰ্থী হৰেণ ছিং বে'ৰ চমকপ্ৰদ উত্থান ৷
একালৰ বিদ্ৰোহী নেতাগৰাকীক উন্নয়ণৰ স্বাৰ্থত আথেবেথে আকোঁৱালি লৈছে পাহাৰৰ সকলো সম্প্ৰদায়ৰ লোকে ৷ বৃহস্পতিবাৰে সন্ধিয়া ডিফুত হৰেণছিং বে'ৰ বিজয়ক লৈ সমৰ্থকৰ মাজত দেখা গ'ল পাৰ ভগা উছাহৰ ঢল আৰু অঘোষিত দিপাৱলী ৷
বাতৰি লিখা পৰলৈকে হাফলঙত বিজেপি ৬৬৪২৮, কংগ্ৰেছৰ ২৬০৭৩, বোকাজানত বিজেপিৰ ২৬৬৫, কংগ্ৰেছ ১৮৯৪, ১৮ নং হাওৰাঘাটত বিজেপি ৬২৮৩১ কংগ্ৰেছ ২০৭৯৯ ,১৯ নং ডিফুত বিজেপি ৫৮৩০১, কংগ্ৰেছ ১৯৬২২, আৰু ২০ নং বৈঠালাংচ'ত বিজেপি ৭৩৬৯৩ আৰু কংগ্ৰেছে ২১৯৬০ টা ভোট লাভ কৰিছে ৷
আনহাতে বাতৰি যুগুতোৱা পৰলৈকে ডিফু লোকসভা সমষ্টিত বিজেপিৰ প্ৰাৰ্থী হৰেণছিং বে'ই তেওঁৰ নিতটতম প্ৰাৰ্থী কংগ্ৰেছৰ বীৰেণছিং ইংতিতকৈ ১,৭৪,১৭৪ ভোটত আগবাঢ়ি আছে ৷
সাংবাদিকৰ সৈতে হোৱা সাক্ষাৎকাৰত বিজেপি প্ৰাৰ্থীগৰাকীয়ে কাৰ্বি আংলঙৰ ৰাইজৰ দীৰ্ঘদিনীয়া ভাৰতীয় সংবিধানৰ অনুচ্ছেদ ২৪৪ (ক)ৰ সফল ৰূপায়ণ এমঅ'এছৰ ১০০ শতাংশ ৰূপায়ণ কৰাৰ বাবে কাম কৰিব বুলি কয় ৷