মিছামাৰীঃ শোণিতপুৰৰ মিছামাৰী অঞ্চলৰ নবিল পথাৰ গাঁও আৰু স্থানীয় নবিল পথাৰ প্ৰাথমিক বিদ্যালয়ত কালিৰে পৰা বৰষুণৰ পানী ওলাই যাব নোৱাৰাৰ ফলত বিদ্যালয়ত পাঠদান কাৰ্যত ব্যাঘাতৰ সৃষ্টি হোৱাৰ উপৰি গাঁওখনৰ ৰাইজ আৰু পোহনীয়া জীৱ জন্তুৰ অৱস্থা কুলাই-পাছিয়ে নধৰা হয়।
অৱশ্যে আজি দুখন জে চি বিৰে কেইবাটাও নলা খান্দি জমা হোৱা পানী বোৰ বাহিৰলৈ উলিয়াই দিয়া হয়। পোন প্ৰথমবাৰৰ বাবে গাঁওখনত কৃত্ৰিম বানপানী সৃষ্টি হোৱাৰ মূলতঃ কাৰণ হল গাঁওখনৰ পূৱ দিশত অৱস্থিত ৰাণী বিল নামৰ জলাশয়ৰ ওপৰেদি আৰম্ভণিৰ পৰা বৰষুণৰ পানী ওলাই গৈছিল। কিন্তু মিছামাৰীস্থ ভাৰতীয় সামৰিক ঘাটিৰ অধীনস্থ ৰাণী বিলৰ ওপৰত এইবাৰ নিৰ্মান কাৰ্য চলি থকাৰ ফলত বৰষুণৰ বাঢ়নী পাৰ হৈ যোৱা দ' জলাশয়টো ওখ হৈ পৰে।
ফলত অঞ্চলটোৰ উত্তৰ দিশৰ পৰা বিভিন্ন নলা, নৰ্দমা, খেতিপথাৰ আদিত জমা হোৱা বৰষুণৰ পানী বৈ আহি আদবাটতে জমা হৈ কোনো পিনে পাৰ হ'ব নোৱাৰি গাঁওখনত প্ৰৱেশ কৰে। শনিবাৰে পুৱাৰ ভাগৰ পৰা কৃত্ৰিম বানপানীক লৈ ৰাইজৰ মাজত হাহাকাৰৰ সৃষ্টি হয়।
ঘটনাৰ খবৰ পোৱাৰ পাছত ঠেলামৰা ৰাজহ চক্ৰ বিষয়া কাৰ্যালয়ৰ পৰা এট দল গাঁওখন পৰ্যৱেক্ষণ কৰি যোৱাৰ পাছত আজি সেনাৰ নিৰ্মাণ কাৰ্য চলাই থকা নিৰ্মাণকাৰী সংস্থা আৰ চি চি কোম্পানীৰ দুখন কৈ জে চি বিৰে নলা খান্দি মানুহৰ ঘৰ, চোতাল, ৰাস্তা, বিদ্যালয় আদিত জমা হোৱা পানী নিয়ন্ত্ৰণ কৰা হয়।
প্ৰাপ্ত খবৰ মতে কালিৰে পৰা গাঁওখনত জলমগ্ন হোৱাৰ ফলত গঞা ৰাইজৰ মাজত হাহাকাৰৰ সৃষ্টিৰ হৈছে কিন্তু দ্বিতীয় দিনালৈকে কোনো এজন জন প্ৰতিনিধি দুৰ্দশাগ্ৰস্ত ৰাইজৰ খবৰ লবলৈ আহৰি নাপালে বুলি ৰাইজে অভিযোগ উত্থাপিত কৰিছে।