বাঘবৰঃ ব্ৰহ্মপুত্ৰৰ বাঢ়নী পানীয়ে বৰপেটা জিলাৰ বাঘবৰৰ কাতুলিত মথাউৰি ছিঙি নিয়াৰ ফলত হাহাকাৰ পৰিস্থিতিৰ সৃষ্টি হৈছে বাঘবৰ অঞ্চলত৷ বাঘবৰ, চেঙা আৰু বৰপেটা সমষ্টিৰ মাজেৰে বৈ যোৱা ব্ৰহ্মপুত্ৰ নদীৰ বাঘবৰ-বহৰি সংযোগী মাথাউৰিটোৰ কাম সম্পূৰ্ণ নোহোৱাত মঙলবাৰে নিশা বাঢ়নী পানীয়ে ছিঙি পেলায়৷
ফলত মুহূৰ্ততে জলমগ্ন হৈ পৰে বিস্তীৰ্ণ অঞ্চল। নিশা শ শ পৰিয়ালে ওখ ঠাই বিচাৰি হাহাকাৰ কৰিবলগীয়া হোৱাৰ লগতে ল'ৰা-ছোৱালী, পোহনীয়া জীৱ-জন্তুক লৈ বিপাঙত পৰে ৰাইজ৷
মুখ্যমন্ত্ৰী সৰ্বানন্দ সোণোৱালে ৩১ মাৰ্চৰ পূৰ্বে ৰাজ্যৰ মাথাউৰিসমূহৰ কাম সম্পূৰ্ণ কৰাৰ নিৰ্দেশ দিছিল যদিও বাঘবৰৰ পাহাৰপুৰ-কাতুলিৰ মাথাউৰিৰ কাম সম্পূৰ্ণ কৰিব নোৱাৰাত মথাউৰি ছিঙি চাৰিটাকৈ পৰিয়ালৰ বাসগৃহ উটুৱাই নিয়াৰ লগতে বহু পৰিয়াললৈ ভাবুকি কঢ়িয়াই আনিছে ব্ৰহ্মপুত্ৰৰ বানে।
আনফালে বাঘবৰ বজাৰো ব্ৰহ্মপুত্ৰৰ বাঢ়নী পানীৰ কবলত পৰিছে। চৰাঞ্চলৰ লোকে নিতৌ প্ৰয়োজনীয় সা-সামগ্ৰী ক্ৰয় কৰিবলৈ আহি বাঘবৰ বজাৰত পানী উঠাৰ ফলত সামগ্ৰী নাপাই উভতি যাবলগীয়া হৈছে। যাৰ ফলত বানাক্ৰান্তই এমুঠি অন্ন বিচাৰি হাহাকাৰ কৰিবলগা পৰিস্থিতিৰ সৃষ্টি হৈছে।
আজি মথাউৰিটোৰ ছিঙি যোৱা অংশ পৰিদৰ্শন কৰে ৰাজ্য চৰকাৰৰ মন্ত্ৰী ৰিহণ দৈমাৰী, জিলা উপায়ুক্ত থানেশ্বৰ মালাকাৰ, স্থানীয় বিধায়ক শ্বেৰমান আলী আৰু বাঘবৰৰ ৰাজহ চক্ৰ বিষয়াৰ লগতে কেইবাটাও বিভাগৰ বিষয়াই। কিন্তু এনে দুৰ্যোগৰ সময়তো সংখ্যালঘু দৰদী সাংসদ ছিৰাজউদ্দিন আজমলে সাহায্য প্ৰদান কৰাটো দূৰৈৰ কথা বন্যাৰ্তৰ ওচৰত থিয় হৈ দুখৰ সমভাগী হ'বলৈকো আহৰি নাই বুলি ৰাইজে অভিযোগ কৰে৷