বিজনীঃ ৰাজ্যৰ ভিন্ন প্ৰান্তত এতিয়া বানৰ তাণ্ডৱ। নিস্তাৰ পোৱা নাই হাগ্ৰামাৰ 'আদৰ্শ বি টি এ ডি'ৰ অন্তৰ্গত চিৰাং জিলাৰ বিজনীৰ মুগলীয়ানবাসীও। তাতে আকৌ প্ৰশাসন-জনপ্ৰতিনিধিৰ দায়িত্বহীনতাই মুগলীয়ানবাসীৰ দুৰ্ভোগ এতিয়া দুগুণে বঢ়াইছে।
যোৱা কেইবাদিনো ধৰি হৈ থকা নেৰানেপেৰা বৰষুণৰ ফলত মুগলীয়ানৰ কাষেৰে বৈ যোৱা যোৱা চাৰা নৈৰ বাঢ়নী পানীয়ে যোৱা ৪ জুলাইত মুগলীয়ান - কঠালগুৰী সংযোগী বাঁহৰ দলংখনকেই উটুৱাই লৈ যায় । ইয়াৰ পিছতে উক্ত পথছোৱাৰে যাতায়াত ব্যাহত হৈ পৰে ।
কিন্তু এইখন দলঙৰ ওপৰেৰেই প্ৰতিদিনে যাতায়াত কৰিছিল ১৫ খন গাঁওৰ ৰাইজে। স্কুলীয়া ছাত্ৰ-ছাত্ৰীৰ লগতে ৰাইজৰ বাবেও যাতায়াতৰ একমাত্ৰ মাধ্যম আছিল দলংখন। অথচ আজিলৈকে বিভাগীয় কৰ্তৃপক্ষ কিম্বা জনপ্ৰতিনিধিয়ে ৰাইজৰ যাতায়াতৰ বাবে কোনোধৰণৰ বিকল্প ব্যৱস্থা গ্ৰহণ নকৰিলে।
উপায় বিহীন হৈ পৰা ৰাইজে এতিয়া কলগছৰ ভূঁৰত উঠিয়েই পাৰ হ'বলগা হৈছে বাৰিষাৰ ভৰা নৈখন। আনহাতে এনেদৰে পাৰ হ'ব লাগিলেও প্ৰতিবাৰে প্ৰতিজনে ভৰিব লাগে দহ টকাকৈ। ইয়াৰ পিছতো কিন্তু ৰাইজৰ দুৰ্দশাৰ খবৰ লোৱাৰ আহৰি নাই বিষয়া-জনপ্ৰতিনিধিৰ। হাগ্ৰামাৰ 'আদৰ্শ বি টি এ ডি'ত এই দুৰ্ভোগে স্বাভাৱিকতে ক্ষুণ্ণ কৰি তুলিছে জনসাধাৰণক।