গহপুৰঃ গহপুৰত চক্ৰং আৰু চেঁচা নৈৰ বাঢ়নী পানীয়ে তাণ্ডৱ অব্যাহত ৰাখিছে যদিও প্ৰশাসনে বানপীড়িতৰ খবৰ নোলোৱাৰ অভিযোগ উঠিছে। ব্ৰহ্মপুত্ৰ নদীৰ লগতে চক্ৰং আৰু চেঁচা নৈৰ বাঢ়নী পানীত জলমগ্ন হৈ পৰিছে গহপুৰৰ বাকৰিদলনিৰ বিস্তীৰ্ণ অঞ্চল।
তলতলি অঞ্চললৈ যোৱা প্ৰধান পথত এতিয়া এবুকু পানী৷ বিগত তিনিদিন ধৰি পানীত আৱদ্ধ হৈ থকা অঞ্চলটোত আজি পৰ্যন্ত উপস্থিত হোৱা নাই স্থানীয় বিধায়ক তথা মহকুমা প্ৰশাসনৰ কোনো লোক। সাগৰ সদৃশ পানীৰ মাজত আৱদ্ধ হৈ থকা বহু পৰিয়ালৰ এমুঠি ৰান্ধিবলৈকো ঠাইৰ অভাৱ ঘটিছে।
বহু লোকে ওখ ঠাইত আশ্ৰয় গ্ৰহণ কৰিছে যদিও খাদ্য সংকটে দেখা দিছে। বানাক্ৰান্ত ৰাইজক বৰ্তমানলৈকে প্ৰশাসনৰ তৰফৰ পৰা কোনোধৰণৰ বান সাহায্য প্ৰদান কৰা নাই বুলি অভিযোগ উঠিছে।
আনহাতে যোৱা তিনিদিন ধৰি জলবন্দী হৈ থকা বন্যাৰ্তক নিৰাপদ স্থানলৈ অনাৰ ক্ষেত্ৰত বিশ্বনাথ জিলা প্ৰশাসনে এই পৰ্যন্ত নিয়োগ কৰা নাই এছ ডি আৰ এফৰ দল। স্থানীয় ৰাইজে সাংসদ আৰ পি শৰ্মাৰ ভূমিকাক লৈয়ো তীব্ৰ ক্ষোভ ব্যক্ত কৰিছে৷